U Bah Prestone bad Ma Sniawbha kum ki Dy CM, 4 sha Garo 8 sha Khasi-Jaintia
Ka jingbhah shuki Myntri u Conrad Sangma
Myntri Rangbah:
Conrad K Sangma
Symbud Myntri Rangbah
Prestone Tynsong
Symbud Myntri Rangbah
Sniawbhalang Dhar
Ki Myntri
>> A L Hek
>> Dr.Ampareen Lyngdoh
>> Paul Lyngdoh
>> Comingone Ymbon
>> AT Mondal
>> Kyrmen Shylla
>> Marcuise N Marak
>> Rakkam A Sangma
>> Shakliar Warjri
Shillong, Lber 06 : Ka Sorkar Meghalaya Democratic Alliance -2 (MDA) ba ïalam da u Conrad K Sangma, u ban bam smai lashai ka sngi kum u Myntri Rangbah ka Jylla, kan don arngut ki Symbud Myntri Rangbah (DyCM) bad kine ki dei na ka sem jong ka Nationa People’s Party (NPP).
Kine ki Symbud Myntri Rangbah ki dei u National Vice President ka NPP bad MLA ka Pynursla Bah Prestone Tynsong bad u MLA ka Nartiang ma Sniawbhalang Dhar.
U National President ka National People’s Party (NPP) Conrad K Sangma hynne ka sngi ula pynbna ba ka Sorkar MDA-2 kan kynthup ïa 8 ngut ki Myntri sorkar na ka NPP, 2 ngut na ka UDP bad mar 1 na ka BJP bad ka HSPDP.
Kat kum ka khubor ba ïajan bad ka MDA-2, la ïathuh ba ki MLA ka NPP ki ban bam smai kum ki Myntri Sorkar nalor u Bah Prestone bad ma Sniawbha ki ban bat ïa ka shuki Dy CM, nangta I Dr Ampareen Lyngdoh MLA ka East Shillong, ma Comingone Ymbon MLA ka Raliang, AT Mondal MLA ka Phubari, Marcuise Marak MLA ka Williamnagar bad u Rakkam Sangma MLA ka Rongara-Siju.
Ki MLA ka UDP ki ban ïoh ïa ka shuki Myntri ha ka Sorkar MDA-2 ki dei u Bah Paul Lyngdoh MLA ka West Shillong bad u ma Kyrmen Shylla MLA ka Khliehriat.
U MLA ba dang shu jop ha ka sien ba nyngkong eh na ka HSPDP na Mawthadraishan, Bah Shakliar Warjri un ïoh ia ka shuki Myntri na kane ka party bad ka BJP pat kala jied ïa u MLA ka Pynthorumkhrah Bah A.L Hek.
Ka tyllong khubor ka iathuh ruh ba ka jingïakren ïa pynbeit ka dang ïaid ba u President ka UDP bad MLA ka Mairang Bah Metbah Lyngdoh u lah ban wan phai biang kum u Lamphang ka ïingdorbar Thaw Aiñ ka Jylla.
U Conrad hynne ka sngi ula pyntip ba ka NPP ruh kala tyrwa ïa ka kyrteng jong u kyrtong ban ïakhun ia ka elekshon sha ka shuki Lamphang ka ïingdorbar Thaw Aiñ bad ba u dang ïakren mynta bad ki paralok ba ïadon ha ka MDA-2 ban ïoh ïa ka jingmynjur lang.