Shillong, Lber 06 : Baroh 59 ngut ki MLA ba thymmai jong ka Iing Dorbar Thawaiñ ka jylla ki la pyndep ïa ka jingsmai hakhmat u Pro-tem Speaker, u Timothy D Shira ha kane ka sngi Nyngkong.
Ha kane ka samoi ba mynta, la don ruh lai ngut ki longkmie, kata kynthup ïa ka MLA ba la jop bunsien na Shillong East Dr. M Ampareen Lyngdoh, nangta ka MLA na Sutnga Saipung Kong Santa Mary Shylla bad ruh ka MLA jong ka Ampati, ka Miani D Shira.
Nalorkine, u Damanbait Lamare ba jop na Umroi constituency u kylla long u MLA ba khynnah tam mynta da ki 26 snem katba u Protem Speaker, Timothy D Shira u dei uba rangbah tam da ki 72 snem.
Kiwei pat ki shim lang ïa ka jingsmai ki kynthup ïa u Conrad K Sangma uban sa shimti ha ka sien kaba ar ïa ka shuki Myntri Rangbah hadien ba u la jop biang na South Tura, nangta u Myntri Rangbah barim Dr. Mukul Sangma, President ka UDP Bah Metbah Lyngdoh uba la jop ha ka sien kaba saw na Mairang.
Nalorkine, kiwei pat ki nongïalam ki kynthup ruh ïa ki arngut ki MLA ba la rim na ka BJP kata u Bah AL Hek na Pynthorumkhrah bad ruh u Bah Sanbor Shullai na Shillong South. Katba na ka NPP pat kiba kham rim ki kynthup ïa u Bah Prestone Tynsong na Pynursla, Bah Sniawbhalang Dhar na Nartiang bad u Bah Comingone Ymbon na Raliang.
Ki arngut ki MLA ka HSPDP ba dang jop ha ka sien kaba nyngkong, u Bah Shakliar Warjri na Mawthadraishan bad ruh u Bah Methodius Dkhar na Mawshynrut ki la pyndep lang ïa ka jingshim smai.
