Shillong, Lber 6 : Ka ophis u Myntri Rangbah duh ka ri u Narendra Modi ka la pynthikna ba ma u bad u Myntri Kam Pohïing ka sorkar pdeng u Amit Shah kin wan ban sakhi da lade lashai ka sngi ïa ka jingpynsmai Kynhun Myntri ban ïalam da u Conrad K Sangma kum u Myntri Rangbah ka jylla bad ïa ki 11 ngut ki myntri jongu. Kane ka jingpynsmai kan long ha ka por 11 baje mynstep ha Raj Bhavan, Shillong.
U Conrad K Sangma u ban sa bam smai lashai ka sngi u la ong ba lashai ka sngi kan long ka sngi ba sah jingkynmaw ha ka histori jongka jylla namar ka dei ka sien ba nyngkong eh ba u Myntri Rangbah duh ka ri un wan ban sakhi bad ïadon ryngkat ha ka jingpynsmai myntri rangbah bad ïa ki myntri sorkar.
U la ong ba kane ka pynpaw ba u Myntri Rangbah duh u ieit ïa ka Meghalaya bad khlem pep un ai ki jingïarap ïa ka jylla kumba la leh ha ki por ba la dep. U la ong ba u Myntri Rangbah duh u kwah bha ba kane ka thaiñ kan kiew ha ki liang baroh. “ Ym dei tang ïa ka Meghalaya hynrei ïa baroh ki jylla kane ka thaiñ bad nga ngeit skhem ba ha kine ki san snem ban wan ngin ïoh ka jingkyrshan ba pura na ka sorkar pdeng hapoh ka jingïalam u Myntri Rangbah duh namar ba u sngewkhia ba u sa wan ban pynshngaiñ ïa kane ka jingbam smai jong ngi” ong u Conrad.
