Shillong, Lber 6 : Ka UDP Mawlai Circle ka la shim ïa ka rai ban ai ka jingkyrshan ïa ka rai jong ki 11 ngut ki MLA ka UDP ban ai jingkyrshan ïa ka sorkar ban ïalam da ka NPP bad kane ka jingrai ka long kaba dei eh ban ïoh ïaka sorkar kaba skhem bad lait na ka jingsynshar President bad kiwei kiwei ki jingeh.
Ha kajuh ka por ka ai khublei ïa u President ka Party u bah Metbah Lyngdoh uba la pyrshang ban khot ïa kiwei ki party ban thaw ïa ka sorkar ban ïalam da ki seng riewlum kumba la thrang da ki paidbah hynrei namar ba ki sngewthuh bym biang ki number khamtam hadien ba ki arngut ki MLA ka HSPDP ki la leit kyrshan noh ïa ka NPP kumta u la pyrkhat da kumwei pat bad ïalam ban ïatreilang pat bad kane ka sorkar MDA 2 kumba la ïatrei lang ha ki san snem kiba la dep. Kane ka long kat kum ka kyrwoh ba la phah da u MLA ba rim ka Mawlai u bah P.T Sawkmie.
