Shillong, Jymmang 25: U Myntri ka Tnad Pule Puthi Rakkam A Sangma, ula kyntu jur ia u President ka Voice of the People Party (VPP) Bah Ardent M Basaiawmoit, ba un sangeh noh na ka jingshong shah thngan namar ka lah ban ktah jur ïa ka jylla.
Haba ïakren bad ki katto katne ngut ki nongthoh khubor, u Myntri ula sot nuksa na ka mukotduma ha Maharashtra ha u snem 2014 ha kaba ka Iingkashari Supreme Court kala pyniap ia ka Ordinance bala pyntreikam da ka Sorkar Jylla, kaba mang tam ia ka bhah ba 50% sha kawei ka Jaidbynriew riewlum. Ka Iingkashari kala pynmih ia ka circular sha baroh ki Jylla kynthup ka Meghalaya, ba dei ban sam bhah ym palat ia ka 50%.
“Ngi ialehkai ba ka ding mynta bad kan sa thang ïa baroh, kynthup ia ka VPP. Kan sa pynjot ia ka lawei jong ki khun samla jong ngi” ong u Rakkam
