Shillong, Jymmang 25: Tang khyndiat por hadien ba la paw pyrthei ka Manifesto jong ka Seng UDP ha ki Social Media kaba la pynpaw ba ka mat ban review ïa ka Reservation Policy, u General Secretary ka UDP, u Dr. Jemino Mawthoh, u la leit ban jngoh bad ai khublei ïa u Bah Ardent Basaïawmoit ha ka jaka ba u shan thngan hajan Additional Secretariat.
U Dr. Jemino, uba la ïa rung lang bad u Bah Ardent Basaïawmoit sha ka Seng UDP ha ka snem 2007, u la ïathuh ba ka long kaba shisha ka mat ban pynkylla ïa ka Reservation Policy ka don ha ka Manifesto jong ka UDP ha kane ka elekshon kaba dang shu dep. U la ïathuh ruh ba dang shen ha ka jingïalang jong ka Party ki la ïakren ïa kane ka kam ha kaba ïadei bad ka Reservation Policy bad ka Party hi ka skhem ba dei ban pynkylla ïa kane ka Polisi bhah thungkam. “Kum ka Party ngim shym la iehnoh ïa kane ka mat ban pynbeit thymmai ïa ka Reservation Policy”, la ong u Dr. Jemino.
U la ïathuh ruh ba ka na ka liang jong ka Party ka la thmu ban leit ïakynduh ïa u Myntri Rangbah, u Conrad Sangma ban ïakren ïa kane ka mat tangba u Myntri Rangbah u la leit noh sha Delhi namar ba ka don ka jingïalang jong ka NPP ha nongbah Delhi.
U la pynpaw ruh ba ka UDP ka ïahap bad ka jingdawa ka VPP ban pynbha noh ïa ka Reservation Policy.
