Mih ki paidbah ha Pynursla, Mawkyrwat, Mawphlang ban dawa review Reservation

0

Shillong, Jymmang 25: Ki paidbah ryngkat ki nongkyrshan ka VPP ki la mih paidbah sha surok mynta ka sngi ban pynpaw ka jingkyrshan ïa ka jingshah thngan u Bah Ardent Miller Basaïawmoit halor ka Reservation Policy.
Ki paidbah ki la ïasnohkti lang bad ka VPP ha Pynursla kaba dei ka Constituency jong u Bah Prestone Tynsong, Symbud Myntri Rangbah ka jylla. Ki paidbah ki la pynlong ka jingïaïaid paidbah da kaba ïa pyrta ban pynrem jur ïa ka Sorkar MDA:2 bad ban pyrta ruh ban dawa ïa ka jingkyrshan pynkylla ïa ka Reservation Policy.
Ki paidbah ki la mih da ki spah ngut bad napdeng kiba la mih ban ïaid paidbah ban shong kyllaiñ myngngor ha Pynursla la don ruh ki nongïalam kiba hakhmat jong u Bah Prestone da kaba ong ba kane ka mat jong ka jaidbynriew ïa kaba ki sngewdei ban kyrshan lang.
Ym tang ha Pynursla, hynrei ha Mawkyrwat ruh, hapoh ka shatri jong ka Sur u paidbah South West Khasi Hills, ki paidbah ki la ïamih ban pynlong ka jingïaïaid paidbah ryngkat ka jingpyrta ban pynrem jur ïa ka sorkar MDA bad bad kyrshan ïa u Bah Ardent. Kawei na ki banner ba la rah ha kane ka jingïaïaid paidbah, ka ong, “Ha u MLA Mawkyrwat, Ha ei phi buh ïa ka lawei jong ngi”. Hato phi hun ba ngin mad ïa ka jingduh kam?”.
Hadien kane ka jingïaid paidbah, la pynlong ïa ka jingïalang ha ïew Mawkyrwat ha kaba la ïoh ïa ka jingkren na ki nongïalam jong ka Sur ki paidbah nong South West Khasi Hills bad kumjuh ruh na ki nongïalam ka HYC, HANM, HITO bad ka Synjuk Seng Samla Shnong.
Uwei na ki nongkren ha na ka “Sur ki Paidbah South West Khasi”, haba ai jingkren ha kane ka jingïalang, u la ong, “Balei tang u Bah Ardent marwei seh u hap ban ïeng na ka bynta ka ri bad ka jaidbynriew?, kiwei pat ki 35 ngut kin shu ïa ïeng beit ha ka jingkhang jong u Conrad Sangma rang ban biang ka shuki la jong?”.
Ha Mawngap pat ha ka jingïalam jong ka VPP Mawphlang, ki paidbah ki la îanih ban ïasoi ha ka Signature Campaign ba la pynlong ha Stand Taxi Mawngap. Ym tang ki Samla, ki longkmie, ki longkpa, hynrei ki khynnah Skul ruh ki la ïamih ban leit soi ban dawa ba u MLA ka UDP na Mawphlang Constituency un kren eiei halor ka jingdawa ban pynbha ïa ka Reservation Policy.
Ha ka 26 tarik mat ki jaka ban pynlong ïa ka jingïashong kyllaiñ myngngor ki long ha Khliehriat, nangta ha Nartiang Constituency, Umsning Constituency, West Shillong bad ha kiwei kiwei de ki jaka. Ha Sohra bad Mairang Constituency kan don ka jingïamih paidbah ha ka 29 tarik mynta u bnai.

Leave A Reply

Your email address will not be published.