Shilllong, Naitung, 12: Ka Khun Hynñiewtrep National Awakening Movement (KHNAM) ha ka sngi Balang ka la dawa ïa ka Sorkar/Deputy Commissioner jong ka East Khasi Hills District ba kan weng noh mardor ïa ka jingpynjari ïa ka Section 144 CrPC ka ban sdang mynta ka sngi Balang ha ka por 10:00 baje mynmiet ba la mana tyngeh ïa ki dukan, ki dukan die jingbam, ka jingtem pynheh sur jingrwai ha ki kali ha kylleng ka nongbah Shilllong.
“Ngi dawa jur ba ka Sorkar/DC kan weng noh ïa kane ka hukum wut wut bad lada kim weng ngin pynlehraiñ ïa u Myntri Rangbah/NPP/UPD/HSPDP/BJP (Sorkar Meghalaya) ha ka Iingkashari,” ong u kyrwoh ba la phah da u Working President ka KHNAM u Bah Thomas Passah ha u kyrwoh la phah sha ki lad pathai khubor.
“Ka jingpynjari 144 CrPC da ka DC, East Khasi Hills District ha sor Shillong bad ban khanglad ïa ki paidbah ban plie dukan hadien ka 10:00 baje mynmiet ka dei ka jingphla bad ka jingkubur jong ka Sorkar Jylla bad ka tnat Pulit kam lah bad kam long kaba tbit ban tehlakam ïa ki jinghuri hura bad ban wanrah ïa ka shongsuk shongsaiñ ha ka jylla. Kane ka jingpynbna jong ka DC ka pyrta jam ba ki shnat Pulit kim long kiba tbit bad kim lah ban ïada ïa u paidbah. Ka Sorkar ka kwah ba set ïa ki paidbah ha ki iing ki jong ki, ban don ka shongsuk shongsaiñ, lada ha kane ka rukom te wat ki lehnoh ruh ki lah hi ban wanrah ka shongsuk shongsaiñ balei ngi donkam Pulit?” la buh jingkylli ka KHNAM.
“Ka KHNAM ka pynrem jur ïa kane ka lynti khawpud kaba ka Sorkar ka la shim. Na ka daw ka jingkyrduh kam bad ban pyrshang ban ieng ha la ki kjat bad ban kyrshan ban bsa ïa la ka iing ki paidbah ki pyrshang ban trei miet da kaba plie dukam bam ban bsa ïa ka iing ka sem watla ka dei ha Khyndai Lad lane ha Laitumkhrah lane ha kiwei kiwei ki jaka. Mynta tang na ka daw kita kiba buaid miet bad ba pynklumar bad namar ba ka tnat Pulit kam lah ban tehlakam, ka long mo kaba shongnia ban shu phah khang dukan ïa baroh bad ban pynbor ïa ki ban thiah khlem bam,” la bynrap u kyrwoh.
“Kaba kham kongsan ka long balei la phah khang tang ïa ki dukan jong ki rit ki ria kiba buh dukan die marbam, balei khlem phah khang pat ïa ki pup/disco ki jaka ïadih buaid? Hato lada bamja harud surok ha Khyndai Lad lane Laitumkhrah shi pliang ka pynbuaid mo?” la kynthoh ka KHNAM.
“Ka 144 CrPC bad ka jingpynbor ïa ki dukan ban ym plie hadien ka 10:00 baje mynmiet ka dei ka jingpyrshang jong ka Sorkar ban khanglad ïa ki paidbah ban kamai ban bsa bad ban pynim ïa la ka iing ka sem bad kane ka jingkhanglad jong ka Sorkar ka dei ka jingpynkheiñ ïa ka hok jong ki paidbah kaba la aibor da ka Artikil 21 jong ka riti synshar ka ri India kaba kdew shai, “Article 21, which clearly states that right to livelihood is an integral part of the Right to life. If one’s Right to livelihood would be deprived, then it means that we are taking that person’s Right to life” ong shuh shuh u kyrwoh.
