Shillong, Lber 24 : U President ka Voice of the People’s Party (VPP), Bah Ardent Miller Basaïawmoit u la kyntu ïa ki paidbah nongkyrshan ba kin ym mih paidbah ha ka sngi ba u kyrtong ka party, Bah Ricky J Syngkon u mih ban leit thep kyrteng khnang ba kan ym ktah bad pynwit ïa ka leit ka wan ki paidbah.
Lah ban kdew hangne ba ka VPP ka pynkhreh ban leit thep kyrteng ha ka 26tarik mynta u bnai, Sngi Ba-ar.
Ha ka kyrwoh, u Bah Ardent u la ong ba bun ki paidbah ki kwah ban leit synran lang ïa u Dr. Syngkon ha ka jingleit thep kyrteng hynrei hadien ba ki ïoh jingtip ba kin poi bun ki paidbah kumta kum ki nongïalam kim banse ban shim ïa kane ka rai.
“Khnang ba kan ym ktah ïa ki nongleit nongwan, ngi la sngewdei ban kyrpad ïa ki paidbah ba kin ïai shah bad ka jingpynbeit ba tang ki nongïalam katto katne kin leit ban synran ïa u kyrtong ha katei ka sngi thep kyrteng,” u la ong.
Tangba u ong pat ba na ka bynta kito ki paidbah kiba kwah, ki lah ban wan sha ophis treikam jong ka seng naduh ka por 8:30 baje mynstep tad haduh ka por ba kin mih lang ban leit thep kyrteng.
Ha kajuh ka por, u President ka VPP u ong ba kaba kham kongsan ka long ïa ki paidbah ba kin mih ryntih ha ka sngi thep vote. U Bah Ardent u la ong ruh ba ka rai ba kum ka party ka shim kadei da kaba buh hakhmat ïa ka bit ka bïang jong ki nongshong shnong ha Shillong ba kan ym pynthut ïa ka leit ka wan jong ki.
