New Delhi, Lber 24: Ka seng liang pyrshah kaba la tip da ka INDIA Bloc kan sa pynlong da ïa ka jingïalang paidbah kaba heh hapoh Ramlila Maidan kaba don ha Delhi ha ka 31 tarik mynta u bnai ban ïada ïa ka bha ka miat bad ka synshar paidbah jong ka ri, ong u nongïalam jong ka seng AAP u Gopal Rai ha ka sngi U Blei.
“Ngin pynlong da ka ‘maha rally’ ha Ramlila Maidan ha ka 31 tarik mynta u bnai pyrshah ïa kaei kaba la jia hapoh ka ri. Ki nongïalam ba ha khlieh duh jong ka NDIA bloc kin ïashim bynta ha kane ka jingïalang,” ong u Rai, uba dei u convenor ka seng AAP kaba ha Delhi.
“Ka Synshar paidbah bad ka ri mynta ka la don hapdeng jong ka jingma. Baroh ki seng saiñ pyrthei kiba don hapoh ka INDIA-bloc kin sa pynlong ïa ka ‘maha rally’ ban ai ka jingïada ïa ka bha ka miat jong ka ri bad ka synshar paidbah,” ong u Rai.
U Arvinder Singh Lovely, uba dei u heh ka Congress ka unit Delhi, u la kynnoh ba ïa ki parti ka liang pyrshah kim ïoh ïa ki kyrdan ban pyni bad mynta lei la khang sa ïa ka pisa ba la kynshew da ka parti Congress bad kumjuh ruh ka jingshah kem u Myntri Rangbah ka Delhi u Arvind Krjriwal.
“ïa kane ka jingialang kaba heh ne ka ‘maha rally’ ka ban long ha ka 31 tarik mynta u bnai kan ym dei tang ka jingïalang saiñ pyrthei hynrei ka jingkhot ban ïada ïa ka ri synshar paidbah bad ban pynpaw ïa ka sur pyrshah ïa ka sorkar pdeng ba la ïalam da ka BJP,” u la bynrap.
