Shillong, 24 Lber: Ban ïaleh ban ïarap ïa ki nongthep Vote kiba don jingïapher ha ki dkhot dkhot met, la pynlong ïa ka jingai jinghikai halor ka “Sign Language” ong ka kyrwoh na ka ophis treikam ka Williamnagar, East Garo Hills.
Ha katei ka prokram la wan ban ïashimbynta da ki 45 ngut ki Master Trainer na East Garo Hills bad North Garo Hills, ban ïoh ïa ki jingnang jingtip shaphang ka Sign Language ban ïoh ban ai jingïarap ïa ki nongthep vote ha ka ilekshon ban wan ka ban long ha ka 19 tarik u ïaïong mynta u snem.
Ka Barefoot Trust kala ai ïa katei ka jinghikai ha baroh ki District jong ka jylla Meghalaya.
Na ka liang ka A Sangma (MCS), ADC (Elections), haba ai jingkren ka la banjur ïa ka jingdonkam ban ym don ka jingnoh shilliang ïa ki nongthep vote bad kala ai ka jingïaroh ïa ka jingshimkhia katei ka kynhun kaba la pynlong ïa katei ka jingai jinghikai.
Ka la ong, “Kane ka Training kan pynthikna ba ki nongïarap ha ka ilekshon kin ïoh ïa ka jingtip bad jinghikai ban nang ban ïakren bad ki nongthep vote kiba don ka jingduna ha ka dkhot met, khamtam ha kaban bat skhem ïa ka hok ka jong ki ban pyndep ïa la ka kamram ha kaban thep vote ban jied ïa ki nongmihkhmat ha ka riti synshar paidbah.
