Shillong, Lber 24 : U Nongai Ktien jong ka Voice of the People Party (VPP) Dr. Batskhem Myrboh ha ka sngi U Blei u la ong ba ka party kam donkam satia ban pynshisha ïa ka jingieid jaidbynriew ha ka NPP lane ha u Symbud Myntri Rangbah ka jylla.
“Ngi dei ban kynmaw ba ka jingieid jaidbynriew ka thew ïa ka jingleh bha ïa ka bynta kaba ngi dei ban leh na ka bynta ka jingmyntoi jong ka imlang sahlang bad khamtam eh ka jingmyntoi na ka bynta ki briew ki bym don ïa kata ka bor ha ka jingim jong ki,” ong u Dr. Batskhem ha ka kyrwoh khubor.
U ong ruh ba lada lah ban noh synnïang ha ka imlang sahlang kampher la don ha kano kano ka kyrdan, kata hi ka la dei ka jingieid jaidbynriew. “Kum ki nongïalam jong ka VPP haba ki ïohi ïa ka jingud jingnam jong ki paidbah bad haba ki ïohi ïa ka jingsynshar donbor bad jingsynshar bamsap jong kane ka sorkar naduh kito ki snem 2018 ter ter ka sienjam ba ngi shim ka long ban leh ei ei khnang ba ki paidbah kin ym ngat ha ka saja. Ngi la shim ïa ka rai ban seng ïa ka VPP da ka jingkitkhlieh ban ïada ïa ki paidbah na ka synshar thombor, synshar donbor bad jingsynshar bamsap abd ka jingsynshar bym don jingkitkhlieh na bynta u paidbah. Kata kadei ka jingnoh synniang jong ka VPP,” u la bynrap biang.
Shwa kane, u Dr. Batskhem u la ong ruh ba ki paidbah i kumba ki la duh ka jingkyrmen ba ka sainpyrthei kadei kaba bha bad ba ka sainpyrthei kadei na ka bynta ka jingmyntoi jong ka imlang sahlang. “Kadei ïa u Symbud Myntri Rangbah ba un ym sngewthuh ïa ka mynsiem ieid ri mynsiem ieid jaidbynriew namarba u la kren padiah kat shaba lap kaba ym ikob shuh ba kan mih na ka shyntur u riewrangbah,” bynrap shuh u Dr. Batskhem.
Ha kajuh ka por u la ong ruh ba ka VPP kan ym pdiang satia ïa u Bah Prestone ban wan pynïasoh sha ka party. U Dr. Batskhem u la ong ruh ba ki lyngoh ban ïohi ba u Symbud Myntri Rangbah u buh jingkylli ïa ki MLA ka VPP ba katno kilometer ka surok ki la shna, katno tylli ki hospital ki la tei. “Kane ka jingkylli ka pynpaw ïa ka bor pyrkhat jong u Symbud Myntri Rangbah ba um pat sngewthuh ïa ka synshar khadar. Mano ba dei ban shna surok hato dei ki MLA, hato dei ki Liang Pyrshah?”
Halor kane, u ong ba kum ki nongshong shnong kynthup lang naduh ki nongïalam jong ka VPP bad kynthup ïa ki MLA ka VPP ki don ka hok ban ïoh ïa ka surok na u kum u Myntri ka tnad PWD. “Kadei ka kamram jongphi ban shna ïa ki surok ba bha. Dei ka jingtlot jongphi ban shna ïa ki surok ba ngi hap ban mad ïa ki surok khohruh khohram kiba pynjot ïa ki kali jongngi bad kiba ki paidbah ki mad ïa ki jingjynjar,” u la ong.
