Wat ym ai jingmynjur ïa ka Land Bill, leit kyrpad ki Nongsynshar Shnong bad Rangbah Kur na u Lat

Shillong, Nailar 04 : Ka Synjuk Ki Nongsynshar Shnong bad ka Synjuk Ki Rangbah Kur, ha ka Sngi Ba-ar ka la leit ïakynduh ïa u Lat ka Meghalaya bad ka la kyntu ïa u ban ym ai ïa ka jingmynjur ïa ka Khasi Hills Autonomous District (Land Administration) Amendment Bill, 2026.
Ka kynhun ka la ai da ka dorkhas ban pynshai ïa ka kyrdan jong ki Dorbar Shnong, Dorbar Raij, and Dorbar Hima, ha ka synshar khadar ha jylla ka ba la seng naduh hyndai hynthai bad ka ba la ïoh jingshaniah na ki paidbah.
Ka kynhun ka la pynshai ba kane ka aiñrew ka long kum ka atiar ba pyntlot bor bad kheiñ dewthala ïa ka iktiar jong ki Dorbar Synshar Riti tynrai ha ka jylla.
La ïathuh ba na ka liang u Lat ruh u la kular ban khmih bad bishar bniah shwa ban ai kano kano ka rai ryngkat da kaba ïa syllok bad ka sorkar jylla.
Ka kynhun ka la kren shai ba ki khlem ujor eiei ïa ka jingthmu ban pynbiang ïa ka rukom korbar ïa ka khyndew katkum ki kor ki bor ka juk mynta na ka bynta ban suk bad kham ryntih ka kam ia ka sorkar bad ïa ki paidbah, hynrei kin ym pdiang ba yn sloit noh ïa ka iktiar jong ki Dorbar Synshar Riti.