Wat u la shongthait na ka kam, hynrei ka jabieng pat ka long kaba nep ban trei sa ka kam saiñ pyrthei: Prestone

Mawkyrwat, K’lyngkot 09: U bah Prestone Tynsong uba dei u Vice President jong ka National People’s Party (NPP) uba bat ruh kum u Symbud Myntri Rangbah ka jylla Meghalaya haba kren ha ka jingïalang jong ka party NPP ha Mawkyrwat Constituency u la pynsngew bha kum ki paidbah ki dei ban tip ba haba ki jied ïa u nongmihkhmat dei ban jied da ka jingstad namar u bah Stelin H. Diengdoh u dei u briew uba la shongthait na ka kam sorkar, hynrei ka jabieng pat ka long kaba nep bha ban trei sa ka kam saiñ pyrthei.
Haba kren ha kawei pat ka bynta, u bah Prestone Tynsong u la ong ba kynmaw bha ba kum ki kyrtong ha ka por elekshon bunsien ki ju pyrshang ban pynbiej ïa ki paidbah kiba lui lui kiba shi-sur ba shi-dur man ka san snem bad ïa kane ka jingong don pat kiba pyrshang ban pynkylla khong da kaba ong, “u bah Prestone u ñiew beiñ ïa ki nongthep vote jong ka jylla” kane kaba la wanrah ka jingïalam bakla. Hynrei u la pynshai pat ba bunsien ki jingkren jong u ki long pynban ki jinghikai ïa ki paidbah ba haba ki jied ïa ki nongmihkhmat ki dei ban jied da ka jingstad. “Don kiba ong ba ka jingjied ïa ki nongmihkhmat kum ki MLA, ki MDC, bad ki MP ki dei tang ki kim ïaleh sngewbha bad kane ka long kaba shyrkhei ïa ka jylla, ka ri bad ka jaidbynriew”, ong u bah Prestone.
Namarkata, ko ki paidbah jong ka Mawkyrwat Constituency ha kane ka kynti ba mynta ki dei ban jied ïa u briew uba biang pura khamtam eh ban jied ïa u bah Stelin H. Diengdoh uwei na ki ophisar sorkar uba dang shu shongthait shen na ka kam bad uba long ruh u briew uba la tip lut ïa kiei kaba u dei ban ïaid hapoh jong ka Secretariat. “Hooid u MLA ba mynta u long u briew uba biang ha ki jingtreikam hynrei kumba kane ka Mawkyrwat ka dei ka jaka pdeng ne ka District Headquarter, to ïa jied noh da u briew uba khambiang bad uta u dei u bah Stelin Diengdoh”, pynsngew u bah Prestone.
“Shibun bah ki kam hapoh jong kine ki 5 snem kum ka sorkar MDA ba la lam khmat da ka NPP ka la leh la ka long ha kaba ïa dei bad u pud u sam bad kiwei de ki kam rad bah hapoh jong ka ri bad ka jaidbynriew”, ïathuh u bah Prestone. Kumta u la buh ka jingkyrpad ïa ki paidbah ba kin buh jingdwai jar jar khnang ba ka party NPP kan wan biang ha ka bor ban ïoh ban pyndep ïa kiba bun bah ki kam kiba kum ka party ka don ka jingangnud. U la ong ruh ba ha ka jingïasaiñ ïa ka MOU, ka Jylla Meghalaya ka ïoh nong 18 sq km ka jaka ha kaba ha kata ka por kata ka 18 sq km ka don hapoh ka Jylla Assam, hynrei don pat kiba ong ba kane ka sorkar mynta ka la die ïa ka jaka jong ka Meghalaya sha ka Assam bad da kaba ki kynnoh khlem nongrim ruh ba hana ki la kamai da ki spah bad ki hajar klur tyngka.
Kumta u la kyrpad ïa kito kiba kynnoh ba wat kynnoh khlem ka nongrim kaba bang bad ki jingshisha ngi don ïa U Blei U ba na jrong Un sa bishar ïa kita baroh ki jingleh, ïoh ba kiei kiei ba ki la kynthoh U Blei Un sa takor kum ïa kita namar ba ka kam shynshar paidbah ka dei kawei kaba kyntang tam kaba ki kum ki nongïalam bad ki nongshynshar ki da kheiñ kyntang bad ñiew burom ïa ka, ong u bah Prestone Tynsong.
Ha kane ka sngi la ïoh ruh ka jingkren na u bah Stelin H. Diengdoh u kyrtong ka NPP na ka Mawkyrwat Constituency ha kaba u la ïathuh ïa ki katto katne ki jingbynta jong ka ïaid lynti ban long uwei na ki kyrtong u ban sa ïa ai reng ha kane ka MLA Election 2023.
Ha kane ka sngi la pynïaid ïa ka jingïalang da u bah H.A. Nongrem bad ki jingkren lyngkot ka kong P. Nongpluh, State President NPP Women Wing, u bah Kitborlang Nongrem, State President NPYF bad kiwei de ki ‘riew rangbah.