Wat shahniah ha ki nongsumar tynrai, haba shah puh bseiñ leit mar mar sha Hospital

Shillong, Nailur, 18: Ka Jamie, ka heprit kaba dang 12 snem ka rta ka la shah puh ha u bseiñ ha kawei ka shnong ha Kharang, Meghalaya ha ka por 5:30 baje janmiet katba ka dang ïalehkai ha kper kaba don hajan iing. Ka la ud pang haduh katta katta na ka kti ba la shah puh kaba la sdang ban sieb. Ka kmie, ka la leit rah mar mar sha ka PHC kaba don hajan, hynrei namar ka jingbym don ïa ka dawai ban ïada na ka jingshah puh bseiñ ne ka Anti-snake venom (ASV) ïa kane ka heprit la pynkit noh sha ki jaka ai jingsumar sha Shillong. Ka kmie kaba dap da ka jingsngewsih, da ka jingai jingmut jong ki paramarjan bad ki para nongshnong shnong ban leit phah sumar ha u nongai dawai kynbat uba don hajan uba la puid da ka tari wat hapdeng ka jingsuh jingthar jong kane ka khynnah bad buh da u maw bseiñ ha ka jaka ba la shah puh bseiñ, ha kaba u nongsumar u ngeit ba une u maw un kjit ïa ka bih na ka jingmong jong ka kti. Suki suki kane ka heprit ka la sdang ban tlot bad ka la sdang ban shem jynjar wat ban pynhiar mynsiem bad mar mar la pynkit ïa kane ka heprit sha Sohra CHC kaba jngai 48 kilomitar (2 kynta) hynrei ynda la poi ha CHC la pynbna ba ka la khladnoh.
Ïa ka sngi ba pynshai paidbah shaphang ka jingshah puh bseiñ la ju rakhe ha ka 19 tarik u Nailur ha ka pyrthei baroh kawei.
Ïa ka jingshah puh bseiñ ne Snake Bite Envenoming (SBE) la pynrung ha ka thup jong ka Neglected Tropical Diseases (NTD) ha u snem 2017 da ka World Health Organisation (WHO). Ka WHO ka la kheiñ antat ba ki don 4.5 hduh 5.4 million ki jingjia shah puh bseiñ ha kylleng ka pyrthei, 81000 haduh 138000 ngut kiba ïap, 400000 ngut kiba kylla anna, ha ka shi snem.
Ha India, la kheiñ antad haduh 2 million bad 58000 ngut kiba ïap shi snem na ka jingshah puh bseiñ.
Ki daw tynrai kiba pynlong ban shu leh bym salia ki bun bha, ka jingbym tip shaphang ka jingleit shah sumar hadien ba la shah puh bseiñ ka duna bha, ka jingbym don ka dawai ASV ha ki jaka ai jingsumar, ki lanot ki kham shahniah ha ki nongsumar dawai tynrai bad kiwei kiwei de ki daw kiba pynlong ïa ki nongshong shnong ban ïakynduh jingeh.
Ïa kino kino kiba la shah puh bseiñ dei ban rah mar mar sha ki jaka ai jingsumar kum ki Hospital hynrei ym ban shu shahniah ha ki nongsumar dawai kynbat.
Ban ïada na ka jingïap, donkam ban pynshai sha ki nongshong shnong shaphang ki lad jingïada na ka jingshah puh bseiñ, kumno ban ïada, kumno ban ai jingsumar kyrkieh bad ban pynsngewthuh ïa ka jingkordor jong ka dawai ASV kiba don ha ki jaka ai jingsumar.
Ïa kine ki jingpynshai donkam ban pynlong ha ki skul, ha ki Asha bad kiwei kiwei.
Ki doktor ha ki PHC bad CHC ki dei ban da ïoh ïa ka jingshah hikai pyntbit kumno ban ai jingsumar kyrkieh, ban ithuh ïa ki dak ki shin na ka jingshah puh bseiñ, ban tip kumno ban ai ïa ka dawai ASV bad kiwei kiwei.
Ki doktor kiba trei ha ki jaka ba kham kynrei ka jingdon ki bseiñ ki dei ban da ïoh jinghikai shaphang ka Basic-life-Support Skills bad ka Airway Management. Dei ban da pynthikna bha ba ka dawai ASV ka dei ban don ha ki jaka ai jingsumar khamtam ha ka por lyiur.
Dei ban da wad jingtip kaba bniah ïa ki jaka ba kham don kynrei ki bseiñ ha ki jylla ka thaiñ Shatei Lammmihngi bad ban pule bniah shaphang ka bih jong ki jait bseiñ bapher bapher bad ban pynmih ïa ka dawai ASV katkum ka jinglong jingman ha ha kane ka thaiñ.
Ha kaba ïadei bad kane, ka ICMR ka la thaw ïa ka National Task Force ban pule bniah shaphang ki jingjia ba ïadei bad ka jingshah puh bseiñ ha India.
U PI jong ka project u Dr Jaideep C Menon (Cardiologist, Amrita Institute of Medical Sciences, Kochi), u Co-PI u Dr Omesh K Bharti (State Epidemiological Officer, Himachal Pradesh) bad u Dr. Santanu K Sharma (Scientist G and Lead PI, Coordinating centre RMRC- Dibrugarh) mynta ki dang wad bniah shaphang ki lad jingïada na ka jingshah puh bseiñ ha ki jylla kane ka thaiñ Shatei Lammihngi kum ha ka jylla Arunachal Pradesh, Meghalaya, Mizoram bad Tripura.