Wat shah ban plie kat bym pat pyndep ka SSFAPL ïa ki kular, kyrshan ka WKSU ïa ka shnong Rwiang

Nongstoiñ, Ïaiong, 16: Ka West Khasi Students Union (WKSU) ha ka sngi Balang ka la pynpaw ka jingkyrshan ïa ki jingdawa ki nongshong shnong ka thaiñ Rwiang da kaba ong ruh ba ka long kaba shisha hakhmat ka pyrthei ba ka Shree Sha kambari Ferro Alloy Private Limited kam shym la pyntreikam pura ïa ki kyndon kiba ladep pruid dak bad pyni shai lyngba ki jingai jingmut da ki ba bun ki kynhun, ha ka public hearing kaba la pynlong ha ka shnong Rwiang ha ka 28 tarik u Ïaiong 2010.
Ha u kyrwoh khubor u Bah D.Sun President ka seng u la ong, “Ka jingdawa jong katei ka shnong na katei ka karkhana saiñ nar ka long kaba dei hok katkum ki jingïateh bad kular, kata ban pyntreikam pura ïa ka jingdonkam jong katei ka shnong, na ka bynta ka khuid ka suba ka mei mariang, ka ïoh kam ïoh jam, ki jingpynbiang ha ki lad ai jingsumar na ka bynta ki nongshong shnong ka thaiñ Rwiang bad kiwei, kumba katei hi ka karkhana ka la ai ïa ki jingkular ba kan pynbiang lut na ka bynta ki jingbha bad jingmyntoi ki paidbah jong ka thaiñ”.
“Hynrei kaba sngewsih ka long ba katei ka karkhana ka shu pynthame kai ïa u paidbah tang da ki jingpynbiej mynta lah da ki phew snem. Ki jingïakut kiba long katkum ki kyndon ba la ïa kut, lada dei bad ka sorkar bad katei ka company lane wat bad ki kynhun trei mon sngewbha lane bad u paidbah jong katei ka shnong ha Rwiang ruh hynrei katei ka karkhana kam patiaw ei ei”.
“Ka seng ka la dep ban dawa na ka por sha ka por sha ki bor ba dei peit jong katei ka company, ba ki dei ban bud ïa ki kyndon kiba la dep ban bynshet ha ki lyngba ki jingthoh kiba shai kiba katei ka company ka dei ban bud ryntih, hynrei kam leh ïa kita”.
U la ong ruh, “Ka seng da kawei ka jingmut na ka bynta ka jingmyntoi jong ki paidbah ha baroh ki liang, ka ai ka jing kyrshan pura ïa ka shnong Rwiang ban khang shuwa shipor ïa katei ka karkhana saiñ nar, tad haduh ba ki trai jong ka M/s Shree Sha kambari Ferro Alloys Pvt. Ltd Rwiang kin ai ïa ki jingdawa ba don nongrim jong u paidbah”.