Shillong, Naiwieng 10: Ka Seng Samla Wahingdoh, mynta ka sngi, ka la pynlong ka jingpynkup burom ïa ki Samla jong ka Shnong kiba la pass ha ki kyrdan bapher jong ki eksam jong ki.
Kane ka jingpynkup burom kaba la pynlong ha ïingdorbarjong ka Shnong, kadei lyngba ka Educational Award kaba arphew khyndai. Ha kane ka jingai burom, la don laiphew wei ngut ki Samla, ha kaba arngut na ki, kidei kiba wan ha ka Top 10 jong ka eksam BSc.
Kong Mazel Ampareen Lyngdoh kaba long ka Myntriba dei peit ïa ka tnad ka koit ka khiah jong ka Sarkar jylla, ka la long ka Kongsan bad u Bah PN Syiem MDC jong ka Mawkhar Pynthor Umkhrah Constituency uba long ruh u Dy. CEM ka KHADC, u la long u Symbud Kongsan.
Ha kaba sdang la ïoh ïa ki kyntien pdiang sngewbha na u President jong ka Seng Samla, u Samla Anthony Lyngdoh .
Haba kren ha kane ka jingïalang ka Kong Ampareen, ka la la ai ka jingïaroh ïa ka Seng Samla kaba la pynlong ïa kane ka jingialang pynkupburom ïa ki Sama pule da kaba ong ba kan long ka jingpynshlur ïa ki Samla ba kin ïabeh sha ka thong jong ka jingnang jingstad bad khamtam eh ban don ka mynsiem ïakhun ha ka jingpule jong ki. Ha kane ka jingkren ruh, ka Kong Ampareen ka la kyntu ïa ki Samla ba kim dei ban ngeit ïa kito kiba ong ba kam myntoi shuh ban pule ne ban ia beh sha ka jingnang jingstad, namar ba lada pass makna ruh ym ïoh kam ïoh jam. Hynrei ka la kyntu ïa ki ba kin trei shitom khnang ban ka plie ka lad ka lynti sha ka jingïoh jam ïoh jam kiba kham sha jrong ne kiba kham heh kyrdan.
U Bah Pynshngaiñ, ha ka jingkren jong u, u la ai ka jingïaroh ïa ki Samla bad ïa ki riew rangbah jong ka Shnong Wahingdoh kiba la pynlong ïa ka jingpynkup burom kaba kum kane ka ban long ka jingai mynsiem ïa ki khynnah samla pule.U la kyntu ruh ïa ki khynnah ba kin long kiba trei shitom khnang ba kin lah ban kyntiew pat ïa kiwei ruh kiba donkam jingïarap.
Ha kane ka sngi la ïoh ruh ïa ka jingkren na I Kong Phidelia Shabong Principal jong ka Seng Khasi Higher Secondary School I la ai ia ki kyntien ai mynsiem ïa ki Samla pule bad kumjuh ruh ka jingsneng jingkraw na u Rangbah Shnong, u Bah Ranjit Marbañiang.
La pynphuh pynphieng ïa kane ka jingïalang pynkup burom na ki Khynnah Skul.
