Shillong,Naiwieng 10 : Na ka bynta ban pynpahuh um ïa ka sor Tura ka sorkar pdeng ka la mang 100 klur tyngka ban pyntreikam ïa ka Tura Bulk Water Supply Scheme.
Haba ïathuh ïa kane ha u Myntri ka tnad PHE u Marcuise N Marak u la ong ïa kane ka skhim la mang na ka North East Special Infrastructure Development Scheme (NESIDS) bad lyngba kane kan ïarap ban pyllait ïa ka Tura na ka jingkyrduh um.
“ Hadien ba la dep ban pule bniah ïa baroh ki kyndon yn sa khot tender noh khnang ba yn ïoh ban sdang kloi noh ïa ka kam” ong u myntri.
U la ïathuh ba ki dang don bun ki projek kiba yn sa buh jingtyrwa hakhmat ka sorkar pdeng. U la ïathuh ruh kumba long mynta ka nongbah Tura ka ïakynduh jingeh bha ha ka liang ka umdih.
“ Ngi la buh ka jingtyrwa ban den ïa ka wah kaba lah ban pyndonkam ha kajuh ka por na ka bynta ka umdih, ban ring um sha ki jaka rep bad kumjuh ruh ban pynwan dur ban khring ïa ki nongwan jngoh kai. Nalor kata ha kajuh ka por haba jia ki jingpluh ïing ki kali pynlip ding ki lah ban wan tong um na katei ka jaka.
U la ïathuh ba ka sorkar jylla ka dang wad jingïarap ruh na ka sorkar pdeng na ka bynta ban pynïoh umdih sa ha ka nongbah New Shillong.
