Shillong, Naiwieng 10 (PIB): Ka Tnat Information and Broadcasting ka la ai jingmynjur ia ka “Digital Advertisement Policy, 2023 ban plie lad bad aibor ïa ka Central Bureau of Communication kaba dei ka tnat ai jingpynbna jong ka Sorkar India ba kan sdang ïa ki campaign ha ka Digital Media.
Kane ka policy ka long kum ka dak jong ka por ba kyrpang jong ka kam jong ka CBC ban ai jingtip shaphang ki skhim, ki prokram bad ki mat treikam jong ka Sorkar India katkum ki jingkylla ha ki kam media bad ka jingkiew ka jingpyndonkam ia ki lad digital ban ioh jingtip.
Ka jingbun ki briew kiba subscribe ha ki kam digital ha ryngkat ka jinglah ai jingtip lyngba ka teknoloji da ki jingpynbna digital ki plie lad ïa ka jingseisoh ki jingai jingtip sha ki briew ha ka rukom ba la thmu bad kane kan wanrah ia ka jingseisoh ka jingpynlut pisa ha ki campaign kiba iadei bad ki briew. Ha kine ki snem ba la dep, ka rukom ïoh jingtip ki briew ka la phai sha ki lad digital. Ka prokram Digital India jong ka Sorkar India ka la wanrah ia ka jingkiew ka jingdon ki briew ha ka ri kiba ïoh ïa ka internet bad ki rynsan social bad digital media. Katkum ka Indian Telecom Services Performance Indicators January–March 2023 jong ka TRAI, ka jingrung ka internet ha India haduh u Lber 2023 ka long palat 800 million bad kito kiba subscribe sha ka telecom haduh u Lber 2023 ka long palat 1172 million.
Kane ka policy kan ïarap ïa ka CBC ba kan pynrung kyrteng ïa ki agency bad ki kynhun ha ki kam OTT bad Video on Demand. Ka CBC kan ïoh ruh ban pynpoi sha ki briew kiba sngap ia ki Podcast bad ki rynsan digital audio lyngba ka jingpynrung kyrteng ïa ki rynsan Digital Audio. Ha ryngkat ka jingpynbeit ïa ka rukom pynrung kyrteng ïa ki Internet Website, ka CBC mynta kan lah ban phah ia ki jingai jingtip lyngba ki Mobile Application ruh. Namar ki rynsan Social Media ki long kiba iaid iew bha, kane ka policy ka pynbeit ruh ia ka rukom ba ka CBC ka lah ban ai jingpynbna na ka bynta ka Sorkar ha kine ki rynsan. Kane ka policy ka aibor ruh ïa ka CBC ba kan pynrung kyrteng ïa ki Digital Media Agency ban kyntiew ia ka jingai jingtip jong ka lyngba ki rynsan bapher bapher.
Ka policy ka ithuh ruh ïa ka jinglong kaba kylla stet jong ki kam digital bad ka aibor ïa ka CBC ba kan pynrung ïa ki lad ai jingtip kiba thymmai bad kiba saiñdur thymmai ha ki kam digital lyngba ka jingai jingmynjur jong ka komiti ba thung na ka bynta kane ka kam. Ka Digital Advertisement Policy, 2023 jong ka CBC ka plie lad ruh ia ka jingtyrwa dor kaba wanrah ïa ka jingshai bad ka jingseisoh ki kam. Ki dor ba ïoh lyngba kane ka lad kin treikam lai snem bad kin long kiba treikam ïa baroh ki agency kiba lah ban ïashim bynta.
Ha kane ka juk mynta, jan baroh ki tnat jong ka Sorkar India ki don la ki jong ki social media handle kiba pynmih shibun ki dur bad ki video kiba ai jingtip ki bym da saphriang bha namar ki dei tang kiba subscribe sha kine ki handle kiba ïohi ïa ki. Ia kine ki jingai jingtip da ki tnat Sorkar yn pynkhlain shuh shuh da ka Media unit jong ka tnat Information and Broadcasting, ka Central Bureau of Communication kaba dei ka kynhun kyrpang na ka bynta ka jingpyllait ia ki jingpynbna ha baroh ki jait media. Ka Digital Advertisement Policy 2023 ka dei kaba la wanrah hadien ki jingïakren bad kito kiba don bynta ha kane ka kam bad ka pyni ïa ka lynti ban pynkhlain ia ka jingai jingtip ka Sorkar India lyngba ki lad digital bad ka pynkhlaiñ ruh ïa ka jingai jingtip sha ki briew jong ka ri.
Ka Central Bureau of Communication (CBC) ka trei hapoh ka tnat Information and Broadcasting bad ka peit ia ka jingai jingtip shaphang ki prokram, ki skhim bad ki mat treikam jong ka Sorkar India hapoh ka ri. Ka CBC ka ïeng skhem ban pynïahap bad ki jingkylla jong ka por bad ban pdiang ïa ki teknoloji ba thymmai khnang ban lah ban ai jingtip shuh shuh sha ki briew.
