Shillong, Naiwieng 09 : Ki kynhun Sengbhalang kiba ïai ïakhih ban ïoh ïa ka ILP bad kumjuh ruh ban ïada na ka jingwan tuid kyrthep ki mynder sha kane ka jylla ki la pynpaw ka jingsngew bitar kaba jur ïa ka sorkar Meghalaya Democratic Alliance (MDA) namar ka jingbym pat pynïeng ïa ki Entry & Exit Point haduh mynta hapoh ka jylla.
U President ka Khasi Students Union (KSU) samla Lambokstar Marngar haba ïakren bad ki nongthoh khubor ula ïathuh ba ki don haduh 18 tylli ki Entry &Exit Point kiba la tyrwa ban pynïeng da ka Sorkar Jylla ha ka wat ba nyngkong kum shibynta ban pyntreikam ïa ka Meghalaya Residents Safety and Security Act (MRSSA), 2016 hynrei baroh ki la shu kut tang ha ki jingthoh namar ha madan hi ym pat don satia kawei ruh na kine ki khyrdop.
“Haduh mynta, ka Sorkar ka dang pynïeng tang ïa ka Umling Entry Point (Ri-Bhoi) kaba la kylla sah ïing jah mynta. Ngim don jingtip shuh aiu bajia ïa ki 17 tylli ki Entry-Exit Point wat hadien bala dep ban sorjamin ïa ki jaka ban thied” ula ong.
U samla Lambokstar ula ong ba kane ka pyni ba ka Sorkar Jylla kam kwah satia ban ïoh bat ne ban beh ïa ki mynder ri kiba wan rung shapoh ka Jylla. “Namar kata, ngi sheptieng ba lada ki mynder ri ki ïoh ban wan rung suk sha Jylla, khlem pep shisien ka sngi kin sa knieh noh ïa ka ïoh ka kot bad ka hok synshar khadar jong ki paid riewlum” ula ong.
Ula ong, haman ka por ba ki leit ban bud dien ïa kane ka kam, ka Sorkar ka pynmih ïa ki daw ba ka MRSS (Amendment) Bill, 2020 bad kumjuh ruh ka Resolution jong ka Inner Line Permit ba la mynjur da ka ïing Dorbar Thaw Aiñ ka Jylla, ki dang sahkut hapoh ka jingbishar ka Sorkar Pdeng.
“Ha ka jingshisha, ngi la ai jingmut ïa ka Sorkar Jylla ban pyntreikam shuwa ïa ka MRSSA, 2016 shuwa ban wanrah ïa ka Amendment ban nang pynkhlaiñ shuh shuh ïa ka aiñ hynrei ka Sorkar kala jam beit shakhmat ban pynbeit ïa ka Aiñ kaba khlem pat pyntreikam” ong u samla Lambok.
Une u Nongïalam ka KSU ula ong ba ka KSU dangshen ka la leit ïakynduh ia u Symbud Myntri Rangbah ba khmih ïa ka Tnad Kam Pohïing Bah Prestone Tynsong, uba pyntip ba ka Sorkar Pdeng ka la pynphai ïa ka MRSSAB, 2020 ha ryngkat ki jingkylli pynshai.
“Hadien kane, ngi la ïohi ba ka Sorkar kala pyrshang ban pyntreikam ïa ka MRSSA 2016 ha ki 7 tylli ki Shnong” ula ong.
Une u Nongïalam ka KSU ula kynnoh ruh ba ki District Task Force (DTF) ba khlieh da ki Deputy Commissioner ba la thung kat kum ka Act, 2016 ki la pyrshang ban ïaid kiar ïa ki Dorbar Shnong bad ong “Namar kata, ngi dawa ïa ka Sorkar Jylla ban pynthikna ba ki Nongkitkam jong ki Dorbar Shnong ki dei ban don ha ki DTF”.
Haba pynsngew ïa kajuh ka sur, u President ka HNYF Bah Sadon K Blah ula ong ba ka Sorkar ka la dei ban pyntreikam noh ïa ki kyndon jong ka MRSSA 2016.
“Ki don kumba 51 tylli ki Entry-Exit Point ha ka Jylla Meghalaya hynrei ym pat don kawei ruh ka ban dep pynïeng, kaba pyni ba ka Sorkar kam shym la shimkhia satia ha ka ban ïada ïa ka Jylla n aka jingwan rung ki bar jylla bad ki mynder ri” ula ong.
U Bah Sadon ula ong ba ka Sorkar Jylla ka dei ban kren shai noh la ka la rai ne kumno ban pynsangeh noh ïa ki jingkular ban pynïeng ïa ki Entry-Exit Point.
