Wat leh klet ïa ka Reservation Policy kyntu ka KHNAM ïa ki Seng Saiñ Pyrthei
6 tarik yn ia kynduh biang ka Expert Committee
Shillong, Naiwieng 27: Ka Khun Hynniewtrep National Awakening Movement (KHNAM) mynta ka Lah Sngi U Blei ka la kyntu ïa kiwei ki seng saiñ pyrthei ba kim dei ban leh klet ïa ka Reservation Policy hynrei ban mih shakhmat bad kren ei ei halor kane ka kam.
ïa katei la kren da u General Secretary ka KHNAM u Bah James MA Neng, hadien ka jingwan ai ïa ka dorkhas ha u Chief Secretary ka jylla u Bah DP Wahlang.
“Ka jingwan ka jong ngi kam dei tang ka jingkyrsiew thiah ïa ka sorkar jylla hynrei wat ïa kiwei ruh ki seng saiñ pyrthei ba kin kren eiei halor kane ka Reservation Policy kumba ki lah ïakhih bad kren na ka por sha ka por bad kam dei ban shu leh klet noh kumne bad ngi khmih lynti ba kan kyrsiew ïa ki, ba kin wan shakmat ban kren eiei halor ka Reservation Policy khamtam kito kiba don ha ka sorkar namar ki don bha ïa ka lad ban pynbor ïa ka sorkar.” ong u Bah James.
“Ngi kyntu ïa kiwei pat ki seng saiñ pyrthei ba kin shimkhia lem ïa kane ka kam khnang ba kane ka kam kan long kaba jop kumba ngi lah khmih lynti ha ki jingialang kiba la dep” ong u General Secretary ka KHNAM.
Haba ïakren bad ki nongthoh khubor, u Bah James ula ong, ba ka KHNAM ka la buddien ha kaba ïadei bad ka jingthung ïa ka Expert Committee kaba khmih bad bishar bniah ïa ka jingthmu ban pynkylla ne pynbeit thymmai ïa ka Reservation Policy jong ka jylla.
“Ka Expert Commitee ka lah dep ban shong ïa ka jingïalang kaba nyngkong ha ka 23 tarik u Naiwieng bad ha ka 6 tarik u Nohprah kan shong ïa ka jingïalang kaba ar lyngba ka Online Video Conferencing bad ïa ka jingïalang kaba lai yn pynlong ha nongbah Shillong” ula ong.
` Ula ong, ba ka KHNAM ynda ka la leit ban ïashim bynta ha ka jingïalang jong baroh ki seng saiñ pyrthei, kan sa pan jingshai halor ka jingbuh ïa ka ophis treikam jong katei ka Committee ha Delhi bad kumjuh ruh ha kaba ïadei bad ka jingbun jong ka jingpynlut ban siew ïa ki jingdonkam baroh jong katei ka committee.
U Nongïalam ka KHNAM ula pynpaw ruh ia ka jingkhmih lynti ba ha u snem ban wan, ka Expert Committee kan pynmih ei ei noh bad na ka liang u Chief Secretary ula pyntip ba kane ka Committee kan sa khot biang ïa baroh ban ïatai sani halor ka mat kaba ïadei bad ka Reservation Policy.