Ka BJP ka kloi ban kdup ïa u Dr Mukul lada wan pynïasoh ha kano kano ka por : Rikman

Shillong, Naiwieng 27 : U President BJP ha Meghalaya u Rikman G Momin mynta ka Lah Sngi U Blei ula ong ba ka Party ka kloi ban pdiang ïa u Myntri Rangbah barim ka Jylla u Dr Mukul Sangma, lada u wan ban pynïasoh bad ka BJP ha kano kano ka por.
U Rikman ula pynpaw ba um pat ïoh jingtip satia halor ka jingïakynduh u Dr Mukul Sangma bad ki nongïalam jong ka party. Ula bynrap ruh ba um don jingeh satia ba un leit ïakren ïa une u Myntri Rangbah barim ka Jylla.
“Mano mano ruh ki lah ban ïasoh sha ka BJP, ka jingkhang ka plie beit. Kan long kaba sngewtynnad shibun lada u (Mukul) wan ban ïasoh noh sha ka party” ula ong.
Lah ban pynkynmaw ba kane kam dei ka sien ba nyngkong ba saphriang ki khubor ba u Dr Mukul u lah ban pynïasoh sha ka BJP. Ka la ju jia teng ba la saphriang ki khubor ba u Dr Mukul u ïakynduh ïa ki nongïalam ka BJP ruh, hynrei na ka liang u Dr Mukul u la dep pynshai teng ba kam pat don satia kaba kum kata ka jingïakynduh bad ki nongïalam ka BJP bad um pat don ka jingthmu ban pynïasoh sha ka BJP kat haduh mynta hi.