Shillong, Naiwieng 27 : Kum shi bynta ka jingpynkhreh na bynta ka elekshon MP kaban sa long shen ha ka jylla, ka BJP ha Meghalaya ha ka sngi Nyngkong ka la pynbna ïa ki nongkitkam ba thymmai ha ka party, kata naduh ki vice president, general secretary bad ki nongkitkam na ki shnat bapher bapher.
U President ba thymmai ka Party, u Rikman G Momin haba kren bad ki lad pathai khubor u la pyntip ba kine ki nongkitkam ba thymmai ki kynthup ïa ki 6 ngut ki vice president bad arngut ki state general secretary kiban peit ïa ki district bapher. Kine ki vice president ki kynthup ïa u Bernard Marak ban peit ïa ka Tura City, Khrawboklang Basaïawmoit bad Wankitbok Pohshna ïa ka East Khasi Hills, Dipul R Marak ïaka South West Garo Hills, Gagan Jain ïa ka Shillong City bad Riya Sangma ïa ka Ri Bhoi.
Katba ki arngut ki state general secretary ki kynthup ïa Dr. Evarist Myrsing ban peit ïa ka Ri Bhoi bad Lakhon Biam ïa ka West Jaintia Hills.
Na kine la jied ruh ïa ki hynriew ngut ki state secretary, treasurer bad kiwei kiwei.
La jied ruh ïa ka Kong Sukhi Pariat kum ka State President Mahila Morcha, Mewakar Lyngdoh State Presidedent Yuva Morcha, Thomas N Marak State President ST Morcha, Ralden Byran Shabong state president Kisan Morcha bad u Shahidur Rahman kum u state president minority morcha.
Haba kren pat halor ka elekshon MP u President u la ong ba ka jingpynkhreh ka la ïaid beit namar ka jingpynthymmai kadei tang ïa ki nongkitkam ha ka state BJP katba ki nongkitkam ha ki shnong bad kiwei kiwei pat ki neh beit kumjuh. U ong ruh ba ïa ka kyrteng ki kyrtong na Shillong bad Tura yn sa pynbna hi da ka High Command na Delhi namarba ka kamram jong u kadei tang ban phah ïa ka kyrteng ki kyrtong shatei.
Ha kajuh ka por pat u la ong ba um lah satia ban ïathuh ïa ki kyrtong kiba thep kyrteng na bynta ka elekshon MP namar kadei ka rai jong ki nongïalam na Delhi.
Na ka liang u President ka BJP u la ong ruh ba ki khot ki wer ïa ki longkmie ban thep kyrteng kum ki kyrtong na ka bynta ban aireng ha kane ka elekshon MP khamtam naba ka sorakr BJP dang shen ka la pynbna haduh 33 persen ka bhah na bynta ki longkmie.
