Shillong, Naiwieng 27 : Ki don haduh kumba 200 tyli ki kam kiba lait na bynta kito kiba nang ban kren English ha ka ri Slovakïa ka ri kaba don ha syndah Poland ha thain Europe.
Haba pyntip ïa kane, u Co Chairman ka Meghalaya State Planning Board, Bah John F Kharshiing u la ïathuh ba ki heh na katei ka ri ki kwah da ki samla na kane ka thain shatei lam-mihngi jong ka Ri ban wan trei.
Katkum ka kyrwoh ba la phah da u Bah John Kharshiing, la ong ba ïa kane la pyntip da u Yash Gurung, CEO & Founder Director, Asporea, Siliguri, bad ki officer jong u ha ka jingïakynduh hynne ka sngi bad u (Bah John) kum u Co-Chairman, Meghalaya State Planning Board, ha nongbah Shillong.
La ïathuh ba kane ka kynhun na Siliguri kadei kaba don jingïadei bad ki ri bapher bapher bad kumta la pyntip ba ki don mynta kumba 200 tylli ki kam ha ka karkhana shna kali Peugeot 208, Citroen C3, jong ka Company Stellantis, Slovakia ha ka jingsiew kaba poi kumba 63,000 tyngka haduh 72,000 tyngka shi bnai nalor ba ka don ka jingsiew tam lada ki nongtrei ki trei tam ne trei smat.
“Ki la pyntip ba ka kynhun jong ki ka don ka jingïateh bad ka kynhun pynïoh kam kaba heh na Kathmandu, Nepal kiba la don lupa ki jingïadei bad katei ka kharkhana shna kali, ha kaba ki don ka lad ban pynïoh ïa kitei ki kam lada ki nongwad kam ki don ïa ka jingtbit lane ka kyrdan kaba biang. Kane ka kharkhana kali ka dei kaba heh bad ki shna 62 tylli ki kali ha ka shi kynta bad ki pynmih haduh 1395 tylli ki kali shi sngi ha Slovakia,”ong u Bah John ha ka kyrwoh.
Shuh shuh la ïathuh ba ha katei ka jingïa kynduh katei ka kynhun ka la mynjur ïa ki jingai jingmut jong u Bah John F Kharshiing ba ïa kane ka kam un sa pynbeit ka jingïakynduh bad ki heh jong ka tnad Labour jong ka sorkar Meghalaya ban ïa kren sngewthuh ban ïa trei ryngkat kumno ba ki samla na ITI / Politechnic bad kiwei kiwei hapoh Meghalaya kin lah ban shim ïa katei ka lad ka kabu ban mih shakhmat ban trei shitom ban poi sha kitei ki kam.
“Ki la pyntip ruh ba ki don ruh ki kam ba bun jait kiba kane ka kynhun ka la don lupa ki jingïadei ha ki Ri ba pher bapher ha kaba ka jingdawa ïa ki nongtrei ka jur bha kum ki nos, ki nongtrei hapoh ki jaka sumar hospital bad kiwei kiwei ha Japan bad Germany tangba ha kitei ki Ri donkam ban pass shwa ïa ar kyrdan kata ban nang ïa ka ktien Japan bad German,” la bynrap shuh shuh ka kyrwoh.
La ong ruh ba kane ka kynhun ka la pyntip ha u Bah John F Kharshiing ba kine ki jingplie lad ba ki nong India kin ïoh leit sha kiwei ki Ri ki dei naduh ba u Myntri Rangbahduh ka Ri, u Narendra Modi u la wanrah ki polisi ban plie lad ïa ki nong India ban leit shabar lyngba ki jingïateh bad ki Ri bapher bapher lyngba ka Ministry of External Affairs,khamtam namar mynta ka don ruh ka jingsdang duna ka jingdon paid ha kiba bun ki Ri sha Europe.
