Shillong, Naiwieng 27: Ka Khasi Hills Autonomous District Council mynta ka Lah Sngi U Blei , ka la leit khynra Trading Licence bad Professional Tax sa sha ka thaiñ Laitumkhrah bad ha kane ka jingkhynra, ka la phah khang khyrdep ïa bun tylli ki dukan jong ki bar jylla ki bym shym la pynbiang ïa kitei ki kot jingdonkam kiba dei ban ïoh na ka Council.
ïa kane ka jingkhynra la ïalam hi da u Executive Member (EM) ka tnat Land Bah Teibor Pathaw ha ka jingdonlang u MDC ka Laitumkhrah constituency Bah Fantin Lakadong.
Ka KHADC ka la khynra ïa ka Professional Tax ban pynthikna ba baroh ki bar Jylla ki siew thikna ïa ki Professional Tax ha ka kam khaïi ba ki trei.
Kane ka jingkhynra ba la pynlong da ki Pulit ka tnat Enforcement ka Cuncil, ka la sdang naduh Fire Brigade ter ter shaduh ïew Laitumkhrah bad la khynra ïa baroh ki dukan kiba don ha shilynter ka surok bah jong ka thaiñ.
Haba kren sha ki lad pathai khubor u Bah Fantin ula ong ba lah ban ong ba kumba 80% ki nong shong dukan hapoh Laitumkhrah ki dei kiba bud ïaki kyndon da kaba pynbiang ïa ki kot ki sla hynrei ki dang bun kiba ym pat tip haba ïadei bad ka jingdonkam ban pynbiang ïa ka Professional Tax.
U Bah Fantin ula ong ba na ka liang ka Executive Committee ka la rai ban ïai bteng ïa ka jingtalasi ïa ki dukan bar jylla naduh ka professional tax bad Traling Licence ym tang ha Laitumkhrah hynrei ha kylleng ki jaka ba hap haka jingkhmih ka District Council.
Ha kane ka sngi ki la don ruh ki bar jylla kiba shongdie madan ki bym don satia ïa ki kot ki sla ba biang bad naka liang ki Pulit ka Enforcement ki la bthah ïa ki ban lum ïa ki mar mata.
