Shillong, Naiwieng 27 :I thei Karina Sheen Phira i la ïoh niah sha la ïing ïa ka kali thymmai Toyota Glanza 2023 Model, na ka jingjop ïa ka khalai nusib napdeng ki season passes ne ticket jong ka Shillong Cherry Blossom Festival, 2023.
U Thei Karina Sheen Phira i la shah jied ha ka jingjied naphang napdeng ki nongleit tamasa kiba thied ïa ki season passes, kaba la nang pynkmen shuh shuh ïa kane ka nongleit tamasa.
Ka Shillong Cherry Blossom Festival 2023, ka dei kaba la pynlong ha ka 17 tarik haduh 19 tarik Naiwieng ha madan Kurkalang, Bhoirymbong. Kane ka tamasa ka la khring ïa ka jingwan ïashim bynta jong ki briew na kylleng ki ri ka pyrthei bad ka jingdon jong ki nongput nongtem bad ki nongrwai kiba pawnam ka pyrthei nalor ki kaitor trai ri.
Ki kaitor ba pawnam jong ka pyrthei kum u Ronan Keating, Neyo, Hybrid Theory, Jonas Blue, Sanam bad ki kaitor nala ri kum u Lou Majaw, Snow White, Meba Oflilia, Wanjop Sohkhlet, Banjop bad kiwei, kila pynshong shit ïa ka tamasa bad nang rah shajrong ïa ka nam ka Jylla ha ka liang ka put ka tem bad ka sap seng kam jong ki samla.
Nalor ka put ka tem, ka tamasa ka la ai ka rynsan ïa ki nongseng kam lajong, kiba la ïoh buh ïa ki dukan (ban pyni nam ïa ki tiar ki tar ba shna kti napoh ka Jylla, ka bam tynrai bad kiwei kiwei.
Ka Toyota Glanza 2023, ka kali top model ba la synniang sngewbha da ka Highland Toyota, ka la nang pynsngew tynnad arshah ïa I Karina Sheen Phira ban sah kynmaw junoma ïa kane ka tamasa.
