Wat hadien ba la ïoh jingbit la khang ba ngin ïaid proseshon ynda poi ha Mawprem: RSS

Shillong, ïaïong, 23: Ka Rashtriya Swayamsevak Sangh (RSS) ha ka sngi u Blei hadien ba ka la ïoh jingbit na ki bor synshar district ban ïaid proseshon na Hindi Balika School, Keating Road da ka jingsynran lang jong ki bor Pulit hynrei la sakhi ba ynda ki poi ha ki bynta jong ka thaiñ Garikhana ban rung sha ki bynta jong ka shnong Maprem ki la shah pakhang lynti ha ki katto katne ki samla kiba la ïeng lypa kiba la ap ha kane ka jaka.
“Ki bor synshar distrik ki la ai jingbit ba ngin pynlong ïa kane ka proseshon kaba la sdang na Keating Road haduh madan Cantonment hynrei ynda ngi la thmu ban ïaid sa sha ki bynta jong ka shnong Mawprem hadien ba ngi la ïoh jingbit na ka ophis u Deputy Commissioner ka East Khasi Hills District ngi la shah pakhang lynti,” ong u General Secretary ka RSS Khasi Hills u Bah Pawnam Khongsni ha ka jingïakren bad u Mawphor.
“Ka jingïaid proseshon ha ka jingshisha ka long kaba jaijai bad kaba ïaid beit hynrei dei tad ynda ngi poi ha Garikhana ba ngi shah pynthut,” u la bynrap.
“Wat hadien ba ngi la ïoh jingbit bad ngi la bud thik ïa ki jingbthah ba la ai na ka ophis jong u Deputy Commisisoner hynrei la knieh noh ïa ka hok jong ngi da ki katto katne ki riew shimkabu haba kumne haei kata ka sysnshar paidbah ha ka jylla,” la buh jingkylli u Bah Khongsni.
Ha kane ka jingïaid proseshon la ïashim bynta kumba san spah ngut ki dkhot ka RSS kiba wan na kylleng ki bynta jong ka Khasi Hills bad Jaiñtia Hills.
“Ka phang pdeng jong ka jingïaid proseshon ka long ban pyni ïa ka jinglong kawei ha ka ri bad ka jingburom ïa ka kolshor bad ka dustur bapher bapher jong ki jaidbynriew ha ka mei India bad dei kane hi ka mat ba ngi shim ïa ka sien jam ban pynlong ïa kane ka jingïaid proseshon,” u la ong.
U Mawphor haba pyrshang ban wad jingtip na u Rangbah Shnong jong ka shnong Mawprem u Bah H Roy Marbaniang da kaba ïakren lyngba ka Telephone u la kyntait war bad ong ba um don jingtip eiei halor ka jingshah pakhang lynti jong ki dkhot ka RSS ban ïaid lyngba ka shnong Mawprem ha kita ki briew kiba kam ïalade kum ki nongshong shnong jong ka shnong Mawprem
“Kam don eiei kaba kum kata ba ka shnong bad ki nongïalam shnong kin khang ïa ki dkhot jong ka RSS ban ïaid proseshon na ka shnong Maprem bad lada ka don kata ka jingshah khang ruh ka lah ban dei da ki riew shim kabu,” u la ong.
Hadien ba ka kut ka jingïaid proseshon ki dkhot jong ka RSS ki la ïalum lang ha madan Cantonment ha kaba la ïoh jingkren na u General Secretary, RSS Khasi Kills u Bah Pawnam Khongsni uba la wer ïa ki samla ba kin wan shakhmat ban noh ïa u synñiang u bynhei sha ka imlang ka sahlang ha ka jylla bad ka ri baroh kawei.
“Kum ka kynhun ngi la trei la ka bynta ha ka jingjar jar ban kyntiew ïa ka jylla ha kine ki 50 snem kiba la leit bad ki kam kiba ngi leh la lah ban sakhi wat ha ki bynta ba kyndong eh jong ka jylla,” u la ong.
U Bah Pawnam u la khot ruh ïa ki paidbah nongshong shnong jong ka jylla ba kin ïohi ïa ki kam ba ka RSS ka la leh ym ban ngeit ha ka jingïalam bakla jong ki katto katne na bynta ka jingmyntoi shimet jong ki.
“Ngin ïaitrei shitom na bynta ka imlang sahlang ha ka jylla bad ngin ïai long ki païa ka roi ka par.” la bynrap u Bah Pawnam.