Kam ka HPC ba kim dei ki nongwan sah beaiñ hynrei kum ki nongshong shnong ba la slem

Shillong, Ïaiong 23 : Ka Harijan Panchayat Committee (HPC) ha ka sngi U Blei ka la kam ba ki Harijan ki dei ki nongshong shnong kiba la sah slem bha hangtei bad ba kim dei satia ki nongwan sah beaiñ.
Haba pynphai nia ïa ka jingkren jong u Symbud Myntri Rangbah ka jylla, Bah Prestone Tynsong haba ïadei bad ka jingpynkhreh pynkynriah noh ïa ki sha ka kawei pat ka jaka, u Secretary ka HPC, u Gurjit Singh u la ong, “Ngi long barabor kiba kloi ban ïa kren kumba ngi la ju ïai kdew mynshwa ha ka jubab ha ka sorkar bad ruh ha ka High Court.”
U ong ruh ba la bunsien ki la kdew ban pynbeit ïa katei ka jingeh kadei lyngba ka jingïakren bad ruh lyngba ka jingpdiang ïa ka mynsiem ban ai bad ban shim bad ruh ban burom ïa ka hok jong iwei pa iwei i nongshong shnong jong ka thaiñ.
Shuh shuh u ong, “u Symbud Myntri Rangbah u la ong ba, “Ngin sa phah ïa ki jingtip ha ka High Court.” Nga tharai ba ïa kitei ki jingtip la dei ban phah naduh kham mynshwa. Ka jingkylli kaba ngi buh ka long ïa kaba kaei ka sorkar ka pynpaw ba, “Balei ïa kitei ki jingtip ym shym la phah kham mynshwa?”
Da kaba ong ba kam long kaba itynnad ba kum u nongïalam um kren ïa ki jingshisha sha ki paidbah lyngba ki lad pathai khubor, utei u Secretary ka HPC u la ong, “Ka blueprint kaba la phah shangi ka dei ka bym pura, kam don ka por, ki don ki nongshong shnong hangtei, ki iing ba tyrwa ïangi ki dei ki bym biang, ka jingkylli mynta ïa ka jaka kaba mut ban ai sha ki longiing ruh ym shym la kdew.”
U la buh jingkylli ruh da kaba ong, “Kumno ngin lah ban ïalehkai bad ka jingim jong ki spah tylli ki longiing jong ki rangbah, longkmie bad khynnah.”
Nalorkata, u la ong ba ki kwah ban pynkynmaw ïa u Symbud Myntri Rangbah ba ki la don hangtei naduh ki snem 1863 bad ba ki don ruh ïa ki kot ki sla hapoh ka kyrteng bad ka shap jong u Syiem ka Hima Mylliem. U ong ruh ba namar ki la don hangne la kumba 200 snem, ka pynlong ruh ïa ki kum ki nongshong shnong kiba la rim bad ba la slem.