Kob u Bah Prestone, shwa ka 8tarik kan don ka jingkylla kaba heh ha politik Meghalaya

Shillong, Ïaiong 23 : U National Vice President ka NPP ba dei ruh u Symbud Myntri Rangbah ka jylla, Bah Prestone Tynsong ha ka sngi Saitjaiñ u la ong ba ka politik ha ka jylla kan sa kylla biang ha shwa ka 8tarik u Jymmang mynta u snem.
“Phin sa ïohi shuh shuh ïa ka politik ka jongngi shwa ka 7tarik bad 8 tarik u Jymmang mynta u snem. Jait ba bun ki ong ba u Bah Prestone u long kum u nongïathuh lypa, nga shu ïathuh lypa ïa kata ruh,” u la ong haba kren ha ka jingïalang ïalap elekshon na bynta u kyrtong ka NPP ha Weilyngkut, Sohiong, Bah Samling Malngiang ha kane ka sngi Saitjaiñ.
Dang ha kine ki khyndiat sngi, la phriang ki khubor ba arngut ki MLA jong ka People’s Democratic Front (PDF) ba kynthup ïa u Bah Banteidor Lyngdoh MLA ka Mawkynrew bad ruh u MLA ka Sohra, Bah Gavin Mylliem kin sa leit ban pynïasoh noh sha ka NPP. Ym tang katta, watla kitei ki arngut ki MLA ki la pynpaw ba ka don ka jingtyrwa na ka NPP hynrei ki khubor ki ïathuh ba kitei ki MLA ki lah ban pynïasoh noh sha ka NPP shwa ka elekshon ha Sohiong.
Shuh shuh u ong ruh ba mynta dei ka NPP ryngkat ki 26ngut ki MLA kaba bat ïa u shabi jong ka Secretariat bad kumta lada jop sa na Sohiong ka jingbun paid kan poi sha ka 27 ngut.
Lah ban kdew hangne ba ka jingpynlong slem ïa ka elekshon jied MLA ha Sohiong kadei hadien ka jingkhlad kyndit u kyrtong ka UDP, Bah HDR Lyngdoh khyndiat sngi shwa ka sngi thep vote.
Kumta, ha ka jaka jong utei u rangbah uba la bat teng ruh kum u Myntri ka tnad Kampohiing ka jylla, ka UDP ka la jied bad pynïeng noh da u pyrsa Kur jong u hi, u Bah Synshar Kupar Roy Lyngdoh Thabah.