Shu sngap kuman ka Sorkar Jylla ïa ka jingdawa ban tei Meghalaya House ha Bangalore

Shillong, ïaïong, 23: U President barim jong ka KSU Bengaluru Unit u Samla Rymphang Nongsiej u la pynpynkynmaw ïa ka jingmutlop jong ka Sorkar jylla halor ka jingbym kren shai la kan shna neem ïa ka Meghalaya House hapoh sorbah Bengaluru, kaba long ka mat jingdawa ba ka seng ka pynsngew naduh u snem 2018.
“Hynrei haduh mynta kam shym la don kano kano ka jingpyrshang jong ka Sorkar ban pynurlong ïa kane ka jingdawa na ka Seng,” ong une u samla haba kren ha ka jingpynthymmai ïa ki nongkitkam jong ka KSU Bengaluru bad Mangalore Unit ha ka sngi Saitjaiñ kiba don hapoh ka Jylla Karnataka.
U la ong ruh ba ka Jylla Karnataka ka dei ka jylla kaba bun tam ki Khasi kiba trei bad kiba pule haba ïa nujor bad kiwei ki jylla ka Ri India hynrei na ka daw ka jingbym don jong ka Meghalaya House ka lah wanrah jingeh khamtam ïa ki samla pule kiba don ha kane ka sorbah.
Ha kane ka sngi ka KSU Bengaluru Unit ka la pynlong ïa ka 3rd Meghalaya Cultural program bad pynskhem ruh ïa ki nongkitkam bathymmai ki ar tylli ki shnat treikam hapoh ka jylla Karnataka ïa kiba lah pynskhem da u Samla James Hitler Mawphñiang uba long kum u Asst. General secretary ka KSU-CEC.
U Deputy Inspector General of Police, Bengaluru u Bah Ïada Martin uba la long kum u kongsan ha kane ka sngi u la kyntu kynpham ïa ki samla pule Khasi haba ki don ha sorbah Bengaluru kim dei ban dei ban don ka jingsngew ïapher dong pher thaiñ para Khasi Khara hynrei ki dei ban ïatylli mlon khnang ban kyntiew ïa la ka ktien, ka kolshor bad ka jaidbynriew. U la pynkynmaw ba kum ki samla ka jaidbynriew ki dei ban weng bad rat dyngkhong ïa ka jingjaituh ka jingsngewmeng bad jingbym sngewïahap kyrdan ban trei ïa ki kam barit baria namar kane ka dei kawei ka lynti ba ngin ïoh ban synshar dalade ïalade ha baroh ki liang.
U Samla Raymond Kharjana uba bat kum u Education Secretary jong ka KSU-CEC haba kren kum u symbud Kongsan u la bynrap ba kum ka jaidbynriew ki samla khasi watla ki jngai na la ing bad ka jingdon ha ka jaka bym ïohi shuh ki khmat ki kur ki kha ne ki kmie ki kpa hynrei kim dei ban klet ïa la ka tynrai kaba ki wan. Ka jingithuh ïa ka jaidbynriew ka dei lyngba ka ktien ba ki kren.
Kumta u la kyntu ba ki samla pule watla ki don jngai na la ing kim dei ban klet ïa la ka tynrai bad ka rympei kaba ki mih, namarba ka jingklet noh ïa kine ki bynta ba kongsan ha ka jingim Khasi kan wanrah ïa ka jingklumar jingmut bad jingsakma ha ka jingim ka jong ki khun samla ka jaidbynriew.
U samla James Hitler Mawphñiang haba kren ha ka jingpynskhem ïa ki nongkitkam bathymmai jong kine ki shnat trei u la kren shaphang ka jingroi sted ka pyrthei jingtip lyngba ki kor technology, Artificial Intelligence bad ba kumno kane ka jingroi sted ka wanrah ïa ka jinglip rong ïa ki mawbyrsiew jong ka jaidbynriew Khasi kita ki long ka tipkur-tipkha, ka tipbriew-tipblei bad ka jingkamai ïa ka hok hapdeng ka pyrthei tynneng ïa ka ka kolshor ki ri Sep ngi.
“Hynrei wat hapdeng kane ka jingroi jong ka pyrthei jingtip ka tynrai jong kano kano ka jaidbynriew ka im bad ieng rasong lada ki dkhot jong ka ki kynmaw ïa la ki mawbyrsiew kiba long ki thied snam ka jaidbynriew,” u la bynrap.
Ha kane ka jingïalang la sakhi lang da ka Kong Ngaitlang Mary Tariang kaba long ka Asst. Professor jong ka Christ (Deemed) University, Bengaluru, u Rev. A. Nongrum u Pastor ba dei peit ïa ka Khasi Jaiñtia Christian Fellowship (KJCF) Bengaluru, u samla Pynshai Ïawphñiaw uba long u Nongaibuit ïa ka KSU Bengaluru Unit bad kiwei kiwei.