Shillong, Ïaiong 23 : Ar tylli ki shnong ha Mylliem constituency ba kynthup ïa ka 12 Mer – Mawkhar bad ka Mawklot – Umlyngka ki la ïoh ïa ka surok kaba kot haduh 7.55 klur tyngka.
Katkum ka jingïathuh da u MLA barim ka Mylliem ba dei ruh u Chief Adviser jong u Myntri Rangbah ka Jylla, Bah Hamlet Dohling la ong ïa ka surok kaba pynïasoh na 12Mer sha Mawkhar yn tei ha ka jinglut kaba kot sha ka 3.34 klur tyngka. Katba ïa ka surok kaba pynïasoh ïa ka Mawklot sha Nongumlong ter ter sha Umlyngka yn tei ha ka jinglut kaba kot sha ka 4.21 klur tyngka.
“Ka surok kaba pynïasoh na Mawklot sha Umlyngka ka long artad ruh kum ka jingpynkhreh na bynta ka Synod kaban long ha u snem 2025 ha Umlyngka,” ong u Bah Hamlet.
Na ka liang utei u nongmihkhmat barim ka Mylliem u la pynpaw ruh ka jingsngewnguh ïa ka Ministry of Road and Transport jong ka sorkar pdeng bad khamtam ïa u Myntri Rangbah ka Jylla Conrad K Sangma bad Symbud Myntri Rangbah, Bah Prestone Tynsong kiba la mynjur ban ai ïa kitei ki surok ha katei ka thaiñ kaba u la tyrwa ha ka por ba u dang long kum u nongmihkhmat ka thaiñ.
