Wat byrngem ïa ki nonghikai SSA, siew ïa ka tulop jong ki, kyntu ka ADE ïa ka Sorkar

Tura, Iaiong 2 : Ki nonghikai SSA hapoh ka jylla haduh mynta ki hap ban ïakhih na ka bynta ka tulop jongki katba ka sorkar ka sngap man man kumta ka seng Association for Democracy and Empowerment (ADE) ka kyntu jur ïa ka sorkar ba kam dei ban byrngem ïa ki nonghikai da kumne kumtai namar ki ïakhih da ka lynti kaba jai jai bad na ka bynta ka hok jongki. Ha ka jaka ban byrngem ka seng ka dawa ba dei ban siew thikna ïa ka tulop jongki khnnang ba ki lait ban ïakhih bad ïoh ban pynleit jingmut ha ki jinghikai ïaki khynnah skul.
Ha ka jingpyllait khubor na u President ka seng u Dalseng Bira Ch Momin, u la ong ba ki don 12,541 ngut ki nonghikai SSA ha ka jylla baroh kawei bad ki hap beit ban ïakhih na ka bynta ka tulop jongki hynrei hapdeng ki jingïakhih, da ki bun bun bnai ka sorkar ka khlem siew tulop ïa ki. Ki la hap ban ïakhih da ki jingiakhih ba jai jai kum ka Non Cooperation Movement, deng lama iong, shong kyllaiñ myngngor bad ter ter ban pynkynmaw ïa ka sorkar halor ka hok jongki.
Naduh shwa Khristmas 2021 ki nonghikai SSA ki hap ban ïakhih ban ïoh ïa ka tulop jongki hadien ba ka sorkar kam shym la siew satia ïa ki. Dang shen ki hap ban ïakhih ha nongbah Shillong. Man ba ïakhih ki bor sorkar kin khot ïakren beit hynrei tang shu sangeh ïakhih ïa ka tulop ruh la leh klet ban pyllait kumta shi kumta ka sorkar ka shu thok shu shukor ïa ki nonghikai, ong ka kyrwoh ka ADE.
Dang ha kine ki khyndiat por ka seng ka la ïoh jingtip ba ki nonghikai SSA ha ri lum Garo ki hap ban sangeh ban leit sha skul ban ai jinghikai ïa ki khynnah skul namar ba ka sorkar ka khlem siew ïa ka tulop jongki. Hadien kane ka sorkar lyngba ka ophis Directorate of School Education and Literacy ki la thoh sha ki Education Officer bad Distrit Mission Coordinator jong baroh ki district ha kaba la bthah ba kin phah ïa ki kyrteng jong baroh ki nonghikai SSA kiba khlem leit shim klass sha ki skul khnang ban pynshitom ïaki. Ka seng ka shim ba kane ka dei ka kam thmu thombor bad ïuh roit jongka sorkar ïa ki jingïakhih ba jai jai kat kum ka riti synshar paidbah jong ki nonghikai SSA. Ka dei tang ka jingpyntieng kohtympan ïa ki nonghikai nalor ba ïa ka tulop jongki pat ym shym la siew.
Ka ADE ka dawa ba ka sorkar ka dei ban siew kloi ïa ka tulop ki nonghkai khnang ba ki ruh kin lait na kino kino ki jingïakhih ba kin ïoh leit skul beit da kaba suk mynsiem bad ai jinghikai hok ïa ki khynnah skul. Nalor kane ka seng ka dawa ruh ba ka sorkar kam dei ban byrngem bad lada ka sorkar ka leh ei ei ïa ki nonghikai ka seng kan ym aili hynrei kan ïeng tylli lang bad ki nonghikai la ka dei ha kano kano ka bynta ruh.