Wat ar tatien ïa u khynnah namar un ym lah ban leh bha shuh ha ka jingpule jong u : GHP Raju

Shillong, Naiwieng 06: U Principal Secretary ka Animal Hubandry u GHP Raju ha ka sngi Saitjaiñ u la kyntu ïa ki nonghikai ba kim ju dei ban pynduh mynsiem ki khynnah skul ne ban artatien ha ka jinglah jong ki ban leh bha ha ka jingpule namar lada ki nonghikai ki artatien da leilei kin ym lah satia ban leh bha ha ka jingpule bad ba kin tynshaiñ ruh.
Haba kren kum u Kongsan ha ka jingpynkup burom ïa ki 414 ngut ki samla pule kiba pas bha ha ki eksamin bapher bapher ha U Soso Tham Auditorium ba la pynlong da ka Raid Laban Sports, Socio & Cultural Organisation(RLSSCO), u Raju u la ong ba kumba ki khynnah ki don ka jingshaniah ïa ki nonghikai jong ki ki nonghikai ruh kim ju dei ban artatien ïa ki khynnah jong ki.
“Phi dei ki nongtbeh jingshai ka imlang sahlang bad ka kam jong phi kam dei tang ka kam ba siew tulop ban ai ja ïa phi hynrei ka dei ka kam shakri ban saiñdur ïa ka lawei u khynnah, namarkata ieid ia ka kam bad aiti lut ha ka namar ka kam jong phi ka dei ka kam donburom” u la ong.
Shuh shuh na ka liang jong u u pynpaw ïa ka jingsngew bynñiaw halor ka jingkiew ki khynnah ba pep skul shiteng por bad u la kyntu ïa ki nonghikai ba kin pyrshang ban wad ïa ka daw ba ki khynnah ki pep skul shiteng por.
Haba kren ha kane ka sngi u Bah Sanbor Shullai MLA ka South Shillong u la ong ba kane ka jingpynkup burom da ka RLSSCO ïa ki khynnah kiba pass bha bad wat ïa kiba ym da pass bha ruh kiba hap ha ki long ïing ba duna ka ïoh ka kot bynsien ka long ka jingaimynsiem kaba khraw bha ïa ki.
U la ong ba ha ki snem kiba la dep kito ki khynnah ba wan na ka ïing baduk ynda ka RLSSCO pynkup burom ha ki eksamin kiba ki ïakhun kham hadien ki ju pas bha namar ka jingïoh mynsiem da kane ka jingpynkup burom.
Ha kane ka sngi na ka liang u Bah Sanbor u la aiti da ki mementos bad ïa ki samla kiba ïoh ha ka kyrdan kiba kham sha khmat bad kiba wan na ka ïing ka sem ba duna ka ïoh ka kot u la ai da ki Laptop.