Na ka jingkha ïa ki khun synrap 125 snem mynshwa, mih ka Balang Presbyterian ha Laitlyngkot

Shillong, Naiwieng, 06: Ka jingbuh kyndon ka Kong Tyrun Kharkongngor hakhmat u Sahep Griffith Griffiths, u mishoneri doctor na Ri Wales, 125 snem mynshwa kata ha ki snem 1897 ba kan kylla long ka Khristan lada u Jisu Khrist sngap ïa ka jingduwai ba kan kha da ki khun synrap ka la kylla long kum ka kam phylla bad lah ban ong ba ka dei ruh ka jingsdang ka Balang Presbyterian ha ka shnong Laitlyngkot.
Ka Kong Tyrun Kharkongngor ka la kha ïa kitei ki khun synrap kynthei ha kaba ka la phah buh kyrteng ïa kitei ki khyllung ha u Sahep Griffiths uba la jer kyrteng ïa ki -iwei da i Glory bad iwei pat i Honoury.
Ha ka jingïaid lynti sha ka jingdap 125 snem lane ka Quasquicentennial Jubilee jong ka Balang ha ka 5 tarik mynta u bnai la plie ïa u mawnongrim bad pynher ïa ka lama kum ka dak ka jingsdang ïa ka jingrakhe da u Rev. T.S. Wankhar ha ka jingïadonlang jong ki nongïalam Balang, u MLA ka Sohra u Bah Gavin M. Mylliem, ki nongïalam shnong bad ki paidriewngeit.
Ka jingrakhe kan kut ha ka 19 tarik u Nohprah, 2022 kaba long thik 125 snem naduh ba la seng ïa ka ha u snem 1897 da u Rev. (Dr.) Griffith Griffiths bad ka Annie Griffiths kum ki mishoneri bad ki Khristan ba nyngkong ki kynthup ïa ka Kong Tyrun, u Tymmen Basan Ganga Ram Sunar uba dei u kpa lem bad ki khun.
Ha kane ka sngi ka Balang ka la khot sngewbha ïa ki khun ki ksiew jong ka Kong Tyrun Kharkongngor kiba la ïa ai khublei mar kylliang bad ki nongïalam Balang.
La ot ruh ïa u Cake kum ka dak ka jingrakhe ïa ka jingdap 125 snem jong ka Balang ha kane ka shnong.