Ka Reservation Policy ka dei ka mat kaba khor tam ban ïakren ong u Symbud Myntri Rangbah

Shillong, Naiwieng 6 : U Symbud Myntri Rangbah ka jylla u bah Prestone Tynsong u la ong ba ka Reservation Policy ka dei ka mat kaba khor tam ban ïa kren bad kane kan ïai long ym tang mynta hynrei wat ha ki por ban sa wan ruh.
“ Ban ktah ïa kane ka mat hap ban peit wat na la liang jong ka aiñ ruh. Ym lah ban shu kren matlah ban ong beit to ngin ïa pynkylla lane wanrah ki jingpynkylla ïa kane ka kam” ong u bah Prestone.
“ Phi ïa tip hi baroh ba kane ka mat Reservation Policy ka dei ka mat kaba khor tam bad naduh ba sdang ki tip shai bha ïa kane haduh katno ka long kaba eh ban ktah ïa kane ka mat la ka dei naduh u snem 1972, mynta ne wat ha ki por ban sa wan ruh” ong biang u Symbud Myntri Rangbah.
U la ong ïa kane halor ka jingdawa jong ka HYC, HANM, EJNC, JSM bad CORP ban wanrah jingpynkylla ne pynthymmai ïa kane ka Reservation Policy.
U la ong wat ka ïing bishar High Court jongka jylla ruh dang shen ka la shimti ïa kane ka kam ha kaba ka sorkar mynta ka la hap ban pynkhreh ïa ka Roster System kaba ym shym la leh mynta la 50 snem.
“ Nga la ong ïa ki seng bhalang ruh to ngin ïatrei lang ban ïa wad ki lad ki lynti kumno ban leh halor kane namar ngim kwah ba kan ktah shilliang ïano ïano ruh la ka dei ïa ki Khasi, Jaintia ne Garo ruh” ong u bah Prestone.
U Symbud Myntri Rangbah u la ïathuh “Mynta man la kawei pa kawei ka tnad sorkar ki la hap ban don da ka roster system kata ruh ym dei tang naduh mynta shakhmat hynrei ka dei ban long naduh ka sngi ba la pyntreikam ïaka Reservation Policy ha ka jylla bad kane ka dei ka hukum ba la rai da ka ïing bishar High Court”
“ Kumta mynta ka sorkar ka dang bishar bniah bad pynkhreh ïa kane ka Roster System bad ki tnad sorkar bapher bapher ki dang bishar bniah kumno ban pyntreikam ïa kane ruh” ong biang u Symbud Myntri Rangbah.
Kine ki san tylli ki seng bhalang ki la kynnoh ba ka Reservation Policy ha kine ki 50 snem ka la ai jingmyntoi tang ïa ki paid Garo bad kumta ki la dawa ba lada ym lah ban pynbeit ka bha ban phiah noh ïa ka jylla Meghalaya ha ki ar bynta.
Halor kane u bah Prestone u la ong naduh ki snem 1980 ter ter ka HSPDP ka la dawa ïa ka jylla Khasi bad Jaintia bad hadien kane wat ka GNC ruh ka la dawa ban ïoh ïa ka Garoland.
“ Kane ka dei ka mat kaba la rim hynrei ka jingkylli ka long hato ngin lah ne em ban ïoh namar lada ngi ïoh lei lei kan dang bha namar katba nang rit katta dang lah ban trei bad shakri bha. Lada ngi ïoh ar balei ngi kwah ban don tang kawei namar kane kan long kaba bha tam hi keiñ” Pynkut u Symbud Myntri Rangbah.