Shillong, Naiwieng 06 : U National Executive Member ka BJP bad Myntri barim ka sorkar jylla, Bah AL u la pynpaw ba u long uba kloi ban ïalam ïa ka party kum u kyrtong Myntri Rangbah ha ka elekshon MLA kaban sa long shen ha ka jylla.
Katkum ka jingong jong u, ka BJP ka don ka jingkyrmen ha ki 40 tylli ki constituency bad kumta ka don ka jingkyrmen ba kna ïoh ban thaw ïa ka sorkar ba thymmai ha u 2023 namar ki paidbha kim sngewtynnad shuh ïa ka sorkar Meghalaya Democratic Alliance ba ïalam da ka National People’s Party.
“Ka jingkyrmen jongngi ka don bha namar katkum ka sorbe ka la lap ba ki don haduh 40 tylli ki constituency ha kaba 22 tylli ki dei kiba don ka jingkyrmen ba ngin jop beit,” ong u Bah Hek.
Shuh shuh u ong ruh ba ha Meghalaya namar ba ki briew kim ju peit party kumta ngi hap ban jied pat da ki briew kiba biang. “Lada ngi don ki briew kiba paka ban aireng ha kane ka elekshon kumta khlem pep ngin ïoh ban lamkhmat ïa ka sorkar kam pher lada ka BJP ka poi ardak ha ka elekshon MLA 2023,” u la bynrap biang. Ym tang katta u kam ruh ba ka party ka lah wat ban jop lut na ki 7 tylli ki constituency kiba don ha Shillong City.
Utei u MLA u la kam ruh ba ki don haduh saw ngut ki MLA na ki party bapher bapher kiba la pynkhreh mynta ban wan ïasoh sha ka BJP.
“Nga la dep ban ïa kren bad ki hynin ka sngi bad saw ngut na ki, kiba ngam pat kwah ban ïathuh kyrteng ki la pynpaw ba ki long kiba kloi ban wan ïasoh sha ka BJP,” u la ong.
Haba jubab pat halor ka jingkylli, utei u MLA u la ong ba ka shong pat ha ki nongïalam na Delhi kiban jied mano ban long u nongïalam ki MLA ha kane ka elekshon kaban wan.
Hynrei u ong pat, “Lada ki bor bahalor ka party ki ailad ïanga ban ïalam kum u kyrtong Myntri Rangbah, nga long uba kloi ban shimti.”
