Bthah ka ECI ban pyndep pynkynriah kam ïa ki ophisar shwa ka 15 tarik u Nohprah

Shillong, Naiwieng 6 : Ka Election Commission jongka India (ECI) ka la bthah ïa ki Chief Secretary (CS) bad ki Director General of Police (DGP) jong ki lai tylli ki jylla ki ban leit sha ka election MLA 2023 kata ka Meghalaya, Nagaland bad Tripura ba ki dei ban pyndep ïa ka jingpynkynriah kam ïa ki ophisar bad phah ïaka kaiphod sha ka Commission ha lane shwa ka 15 tarik Nohprah 2022.
Kat kum ka shithi ba la phah da u Principal Secretary ka ECI u Narendra N Butolia ha ka 4 tarik Naiwieng ka la ong “ Ka Commission ka la bthah ba ka jingpynkynriah kam ïa ki ophisar ka dei ban long bad dei ban pdiang da baroh ki CS bad ki DGP bad ïa ka kaiphod ba bniah halor kane dei ban phah sha ka Commission ha lane shwa ka 15 tarik Nohprah”.
Ka la ong ba ka Commission ka pyntreikam ïa kane ka polisi kaba la leh naduh mynshwa haduh mynta ba kino kino ki ophisar kiba hap ban ïashim bynta ha ka election ha ki jylla ne ki Union Territory kim dei ban don ha ki district jong ki ne kim dei ban dang don hajuh haduh ka election khamtam lada ki dei kiba la don slem ha ki district ba ki don baroh shi katta.
Na kata ka daw ka Commission ka la bthah ba ki ophisar kiba hap ban ïashim bynta ha ka election kim lah ban don sah ha kajuh ka district. “ Lada ki dei kaba dei lei lei na kajuh ka district bad don ha kata ka district palat ïa ka lai snem ha kine ki saw snem ba la dep dei ban pynkynriah kam noh shisyndon namar lada ki la shakri palat ïaka lai snem la dei ruh ban pynkiew kyrdan ïaki sha wei”.
Lada ha ki jylla kiba rit ne ki UT ki shem jingeh ban bud pyrkhing ïa kane ka hukum kata ki dei ban ai jingthoh sha ka Commission lyngba u CEO da kaba kdew ïa ki daw kiba shai kdar khnang ba ka Commission kan pynmih da kawei pat ka hukum na ka bynta jong kiba kum kita.
Ha kaba iadei bad ki district officer, ka Commission ym dei tang ïa kiba thung na ka bynta ka election kata kum ki DEO, Dy DEO, RO/ARO, ERO/AERO hynrei ki ophisar kiba la thung kum ki Nodal Officer kata kum ki ADM, SDM Dy Collegertor, Joint Collector, Tehsildar, BDO lane kino kino ki ophisar ki ba hap ban ïashim bynta ha ka election dei ban pynkynriah kam beit.
Na ka bynta ki pulit Ophisar, ka Commission ka la bthah ba kan treikam naduh ki IGP, DIG, Commandant, SSP, SP, Addl.SP, SDPO, SHO, Inspector, SI, RI , Sergeant Majors bad kiwei kiwei kiba ïadon kti ban peit ïa ka jingpahara ha ka por election dei beit ban pynkynriah kam.
Ki pu lit kiba trei ha ki ophis kum ha ka Computerization, Special Branch, Training kim hap ha kane ka jingbthah.
Ki Sub Inspector shaneng kim dei ban don ha ka district lajong lada ki dei kiba la shakri palat ïaka 3 snem ka kajuh ka district kumta dei ban pynkynriah kam noh ïaki.
Ki ophisar ne ki doktor, ki engineer, ki nonghikai bad kiwei kiwei kiba ym ïadon kti bad ka election kim dei ban shah ktah.