Shillong, Risaw 19 : Ka ïing bishar High Court jongka jylla mynta ka Sngi Palei ka la bthah ïa sorkar jylla ba kan pynthikna ba ka Jowai Municipal Board (JMB) kam dei shuh ban dang ailad ba u niut un dang kynton biang ha ka nongbah Jowai tad haduh ban da dep tei ïa ka jaka bret niut kaba paka.
“ Ka sorkar jylla ka dei ban pynthikna ba ka JMB ka dei ban lum thikna ïa ki niut bad ym dei ban dang shah ban lum ne kynton ïa ki niut ha kino kino ki jaka jongka nongbah Jowai tad haduh ban da dep tei ïa ka jaka bret niut kaba paka” ong ka ïing bishar ba la khlieh da u Chief Justice Sanjib Banerjee bad shong bishar lang ruh bad u Justice W.Diengdoh halor ka mukotduma PIL ba la ujor da ka Synjuk Ki Waheh Shnong Jowai.
Haba shong bishar halor kane ka mukotduma ki nongujor kiba la don mynta ka sngi ki la ai jingthoh ba wat hapdeng ki jingpynmih hukum ka ïing Bishar HC kam don ka jingwan lum thikna ïa ki niut ki nier na ki nongshong shnong ka sor Jowai. Katba ka JMB pat ka pynpaw ba kumba la pynpaw mynshwa ba leh ruh kumta hi.
Ha ka hukum ba la pynmih mynshwa la pynpaw ba la shna ïa ka 10TPD Solid Waste Management bad la dep kumba 70 % ei ei ka jingtei bad la pynpaw ruh ban pyndep hapoh une u snem.
Na ka liang u Additional Advocate General u la ïathuh ba kam shym la don ka jingpynsuki ïa ka kam bad hapoh une u snem yn pyndep ïa ka jingtei.
Katba ka JMB pat kaba suki ka jingtreikam ka dei ban pynthikna ïa ka rukom lum niut jongka bad pyntip ruh sha ka ïing bishar kumno la lum ïa ki niut na ki ïing briew bad na ki jaka ïew tad haduh ban da dep tei ïa katei ka jaka bret niut.
Kane ka jingujor mukotduma na ka bynta ka bha ka miat ki paid nongshong shnong ka la long kaba seisoh. Hynrei lada jia ba ka rukom treikam ka JMB kam pynhun ïaki paidbah ki nongujor ne kino kino kiba ïa kynduh jingeh ki lah ban ai jingtip sha ka ïing bishar, pynkut ka hukum ba la pynmih mynta ka sngi.
