Shillong, Risaw, 19: Ka Ingbishar Meghalaya High Court ha ka sngi Palei ka la bthah ïa ka Sorkar Jylla ban shim ïa ki lad ki lynti ban pynthikna ba ka umbam umdih kaba biang ka dei ban poi sha baroh ki nongshong shnong jong ka jylla.
Ha ka hukum ba la pynmih ha kaba ïadei bad ka PIL ba la ujor u Working President ka KHNAM u Bah Thomas Passah, ka Bench kaba kynthup ïa u Chief Justice u Sanjib Banerjee bad u Justice W. Diengdoh la ong, “ka jingujor hangne ka long halor ka jingduna ïa ka jingsam ka umbam umdih ha ki bnai lyiur. Mynta, hadien ba ka jinghap slap bad ka lyer kit slap ka la sangeh na ka jylla la khmihlynti ba ka Jylla kan shim ïa ki lad ki lynti ban pynbiang ïa ka umbam umdih kaba biang sha baroh ki nongshong shnong.”
Ka Bench ka la kdew ruh ba lada don kano kano ka jingduna, kane ka jingud jingnam ha ki sngi ki ban sa wan, u nongujor lane kino kino ki riewpaidbah ki lah ban tied ïa ka jingkhang jong ka Iingbishar.
