Shillong, Risaw, 19: U General Secretary jong ka All India Congress Committee (AICC) uba peit ïa ka Meghalaya u Manish Chatrath ha ka sngi Palei u la ong ba ki nongïalam kiba la mih noh mynshwa na ka Congress mynta ki la pynpaw ba ki kwah ban wan phai biang sha ka party.
“Ym dei tang ha Karnataka hynrei nga kren ha baroh kawei ka ri India. Ki nongïalam ha baroh kawei ka ri India, kiba la iehnoh ïa ngi lane ki bym don jinghun bad kiwei pat ki party, mynta ki la kwah ban wan phai biang sha ka party. Ki don katto katne kiba nga tip. Ki la pyntip ïa nga bad bad kin sa khot lang ïa kiwei ruh ki nongïalam. Haba ki briew ki ïohi ba ka saiñpyrthei ka la kylla bad phi sdang ban ïoh ïa ka jingjopo kin sa wan phai biang,” ong u Chatrath ha ka jingïakren bad ki lad pathai khubor.
Haba kylli shaphang u Myntri Rangbah barim u Dr. Mukul Sangma bad kiwei kiwei pat ki nongïalam na Meghalaya kiba la mih noh na ka Congress, u Chatrath u la ong, “ha kaba ïadei bad kane ka Jylla, u President ka PCC u tip kham bha ban ai jubab ïa kane ka jingkylli.”
“Khlempep, katto katne ki briew ki dang don ka jingïadei. Ngam ong ka kyrteng jongno jongno hynrei haba ka wan ka jingtyrwa na u President ka PCC, yn hap ban pyntip shwa sha ka AICC, ka ban sa shim pat ïa ka rai,” u la bynrap.
