Shillong, Risaw, 19: U General Secretary jong ka All India Congress Committee (AICC) uba peit ïa ka Meghalaya u Manish Chatrath ha ka sngi Palei u la kob da kaba pynpaw ïa ka jingsngewskhem ba ka Congress ha kan jop ïa ka elekshon na Shillong bad na Tura Parliamentary Seat ha ka elekshon Lok Sabha, ban sa long ha u snem ban sa wan, bad takraiñ tyngeh ïa ka Sorkar MDA ba la ïalam da ka National Peoples Party (NPP) kaba la phiel ban pynurlong ïa ki jingkular ba ka la khlei sha ki paidbah jong ka jylla.
“Nga tharai kan don ka jingkylla ha ka elekshon Lok Sabha bad ngi don ka jingthikna ba ngin jop ïa kine ki ar tylli ki Seat,” ong u Chatrath ha ka jingïakren bad ki lad pathai khubor.
“Ha kaba ïadei bad ka kynhun jong ka MPCC hapoh ka jingïalam jong u Bah Pala, bad phi ïohi hadien ba la thaw ïa ka Sorkar thymmai ha u bnai Rymphang-Lber, ki la mih ki jingkylla. Kaei kaba ki la kular kim shym la lah ban pynurlong,” u la ong bad bynrap, “ha ka samoi baladep ruh ki la khlei ïa ki kular kaba kim shym la pynurlong. Mynta ki paidbah suki pa suki ki la sngewthuh ïa kaei kaba kane ka Sorkar ka leh. Ka jingkyrduhkam kyrduh kam ka la nang kiew.”
Da kaba pynpaw ba ka jingpynkhreh ïa ka elekshon ka la nang ïaid shaid shaid, u Chatrath u la ong, “ha kaba ïadei bad ka elekshon ha rilum Khasi bad Garo, ngi don ïa ki nongïalam ba la kham rangbah, ki don bun ngut ki kyrtong bad ha kaba kut ka shong pat ha ka Screening Committee ha Delhi ban shim ïa ka rai bad hadien kata yn sa phah pat sha ka Central Election Committee ban shim ïa ka rai ïa kino ki kyrtong kiba kham don bun ka lad ban poi sha ka thong.”
Ha kaba ïadei bad ka jingïaid lynti jong ka seng Congress, u Chatrath u la ong bun na ki party ki la pynïasoh bad ka kynhun INDIA bad ka la long ruh ka kynhun kaba khlaiñ kaba don ïa ki nongïalam kiba la kham rangbah na kiba bun ki jylla.
“Lada nga sdang na Tamil Nadu, West Bengal, Delhi, Rajasthan, Madhya Pradesh, bad Punjab, ngi don bun ki jylla kiba heh bad ki nongïalam kiba tbit kiba long ki Myntri Rangbah. Ka Bihar ruh kumjuh, ka Maharashtra bad kane ka Kynhun ka la long kaba khlaiñ da ka jingdon jong ki nongïalam kiba tbit katba sha kawei pat ki don tang ïa uwei u nongïalam,” u la ong.
“Ngin sa ïa peit, namarba ngi dang don sa hynriew bnai bad hadien kata kito kiba dei kin sa hap ban ai jubab ïa kane ka jingkylli,” u la ong.
