Shillong, Risaw 19 : Ka Sorkar Jylla ka la tyrwa ban tei pynheh noh ïa saw tylli ki jaka thang briew kiba don ha ki saw tylli ki jaka sor hapoh ka Jylla.
ïa kane la pyntip da u Secretary ka Tnad Social Welfare ha ka kaiphod ba lyngkot, kaba la aiti sha ka Iing bishar High Court ka jylla ha ka jingshong bishar ïa ka PIL bala ujor da ka Seng Khasi Hima Crematorium mynta ka sngi Palei.
Ha ka hukum, ka ïing bishar ba kynthup ïa u Chief Justice Sanjib Banerjee bad Justice B Bhattacharjee, ka la ong ba ka kaiphod ka la kdew ïa ka jingtyrwa ban tei pynheh ïa ki jaka thang ba la don lypa ha ki saw tylli ki jaka kata ha Shillong, Tura, Jowai bad Nongpoh.
Ka kaiphod ka la kdew ruh ïa ka sor kaba saw, Nongstoin hynrei kam shym la don satia kano kano ka jingtyrwa ban tei pynheh ïa ka jaka thang briew kaba don ha Nongstoin.
Ka ïing bishar ka ong ba ha kaba ïadei bad ki saw tylli ki jaka sor kynthup ka Shillong, katto katne ki jingtyrwa ki dei kiba hapoh ka Special Assistance Scheme for Capital Investment 2023-24 hynrei kam shym la don jingkdew satia ba haduh katno ka kam kan ïaid ha kane ka jingtyrwa.
