Shillong, Nailar 25: U myntri ba dei peit ia ka tnad Housing u Marcuize Marak u la wan rah hapoh ka ïing dorbar ïa ka Meghalaya State Housing Board Repealing Bill, 2024, kane ka long ban pynduh noh ïa ka Meghalaya State Housing Board (MSHB).
Ha ka jingbatai haba wanrah ïa kane ka bill ka long ba, ka Meghalaya State Housing Board Act, 1986 (Meghalaya Act No. 6 of 1986) la shna ïa kane ka aiñ ban thaw ïa ka State Housing Board na ka bynta ban peit ïa ki kam shna ïing ha Meghalaya.
Kane ka aiñ ka la treikam palat ïa ka laiphew snem, wat la ka don ka jingthmu kaba bha hynrei kam shym lah ban treikam katkum ka jingthmu na ki daw kiba bun bad kam shym lah ban pynrulong ïa ka jingthmu ban pynbiang ïa ki ïing ïa ki briew ha kane ka jylla.
Ka jingbym lah ban pynïaid, ka jingbym don ïa ka jingkitkhlieh bad ka jingïatyngkhuh ha ka rukom treikam bad kiwei ki tnad treikam jong ka sorkar. U Myntri Rangbah ba mynshuwa u la khot ïa ka jingïalang ha ka 04/12/2014 bad la shim ïa ka rai ban pynduhnoh ïa ka Board.
Lah ban pynkynmaw ba u Accountant General u la ujor ïa ka jingdon jong ka Board kaba khlem treikam shuh wat la ka Public Account Committee ka la bthah naduh u snem 2017 bad ka cabinet ka la don kajuh ka jingmut ban pynduhnoh ïa ka MSHB bad ban pynduhnoh ïa ka aiñ MSHB Act 1986.
Ïa kane ka Bill kaba la wanrah ha ka Dorbar Synrai ka long ban pynduhnoh ïa ka MSHB Act 1986 (Meghalaya Act No.6 jong 1986) kaba la pdiang da ka Cabinet vide ID No.60 ka mat kaba No.75/2024 kaba ïadei bad ka tulop kaba lah ban mih na ka jingpynduh noh ïa ka Board.
