Wanrah ka Tnat Information and Broadcasting ïa ka Broadcasting Services (Regulation) Bill, 2023

Shillong, Naiwieng 11 : Ka Tnat Information and broadcasting mynta ka sngi ka la pan ïa ki jingai jingmut halor ka Broadcasting Services (Regulation) Bill, 2023. Ka Cable Television Networks (Regulation) Act 1995 ka dei kaba la treikam mynta la laiphew snem kum ka ain kaba kongsan kaba peit ïa ki kam broadcasting ba kynthup ruh ïa ki cable network. Hynrei ki kam broadcasting ki la mad shibun ki jingkylla katba dang ïaid ka por.
Ki jingkiew shaphrang jong ka teknoloji ki la wanrah ïa ki rynsan ba thymmai kum ka DTH, IPTV, OTT bad kiwei kiwei.
Lyngba ka jingkylla digital ki kam broadcasting, khamtam ha kaba ïadei bad ka cable TV, ka long kaba donkam ban pynïaid ryntih ïa ki kyndon. Kane ka kynthup ïa ka jingpynthikna ha ka jingsuk ban trei ha ki kam khaii pateng bad ka jingkyntiew ïa ka jingbud ïa ki ain Programme Code bad Advertisement Code da ki nongpyni prokram bad kito kiba pyntreikam ïa ki rynsan Distribution.
Da kaba ithuh ïa ka jingdonkam ïa ka rukom treikam kaba kham bha, la ai jingmut ban wanrah bujli ïa ki kyndon ba don mynta da kawei ka ain kaba thymmai bad kaba pura.
Ka tnat Information and Broadcasting jong ka Sorkar India ka la ai jingmut ban wanrah da ka draft Broadcasting Services (Regulation) Bill, 2023. Kane ka draft Bill ka wanrah ïa kawei ka rukom treikam ba pura ha kaba ïadei bad ki kyndon kiba peit ïa ki kam broadcasting ha ka ri bad ka thmu ban wan bujli ha ka jaka jong ka Cable Television Networks (Regulation) Act, 1995 kaba don mynta bad kiwei kiwei ki kyndon jong ki mat treikam kiba peit ïa ki kam broadcasting ha ka ri.
Kane ka Bill ka pynïaid ryntih ïa ki kyndon, ka pynïar ïa ki kam ba ka peit ban kynthup lang ïa ki prokram Over-the-Top(OTT) bad ki khubor digital, bad ka wanrah ruh ïa ki jingbatai bad ki kyndon na ka bynta ki teknoloji ba mih thymmai. Ka thmu ban thung ïa ki Content Evaluation Committee bad ka Broadcast Advisory Council, ki prokram bad advertisement code na ka bynta ki nongpyntreikam ïa ki rynsan broadcasting bapher bapher, ki lad na ka bynta ki briew kiba don jing duna dkhot met bad ki jingdainkuna haba pynkhein ïa ki kyndon ha ryngkat kiwei kiwei.
Kane ka Bill ka donhynriew tylli ki Chapter, 48 tylli ki Section bad lai tylli ki Schedule.
Ki mat ba kongsan:
1. Ka jingpynïaid ryntih bad ka jingpyn thymmai: Kan pynbeitïa ka jingdonkam ban pynïaid ryntih bad pynthymmai ïa ki kyndon na ka bynta ki jingai jingshakri broad casting bapher bapher hapoh kawei ka rukom treikam kaba ïadei bad ka ain. Kane ka sienjam ka pynïaid ryntih ïa ki kyndon. Ka pynïar ïa ka kam ba ka peit ban kynthup ïa ki prokram over-the-top (OTT) bad ki digital news bad ki prokram kiba ïadei bad ki jingjia ba mynta kiba hap hapoh ka IT Act, 2000 bad ki kyndon kiba don ha kane.
2. Ki jingbatai katkum ka juk mynta bad ki jingpynkhreh na ka bynta ka lawei: Khnang ban pynïahapbad ki jingkylla ha ka teknoloji bad ki jingai jingshakri, kane ka billa ka wanrah ïa ki jingbatai katkum ka juk mynta ïa ki bynta kiba ïadei bad ki kam broadcasting bad ka wanrah ruh ïa ki jingpynkhreh na ka bynta ki teknoloji broadcasting kiba dang mih.
3. Pynkhlain ïa ka jingpeit hi ïa ka jingbud ïa ki kyndon: Ka pynkhlain ïa ka jingpeit dalade ïa ka jingbud ïa ki kyndon da kaba wanrah ïa ki ‘Content evaluation committees’ bad ka pynkylla ïa ka Inter-Departmental Committee kaba la don lypa sha ka ‘Broadcast Advisory Council’ kaba kham ïadon bynta bad kaba kham ïar.
4. Differentiated Programme Code bad Advertisement Code: Ka plie lad ïa ka rukom peit kaba pher ïa ka Programme bad Advertisement Code ha ki jingai jingshakri bapher bapher bad ka donkam ïa ka jingkynthup da lade ha ki thup bapher bapher da ki broadcaster bad ki sienjam ba khlain ban tehlakam ïa ki prokram ba ym dei ban pyllait salonsar.
5. Ki lad na ka bynta ki briew kiba don jingdunaha ki dkhot met: Kane ka bill ka pynbiang ïa ki jingdonkam ba kyrpang jong ki briew ba don jing duna dkhot met da kaba plie lad ïa ka jinglah ban pynmih ïa ki kyndon na ka bynta ka jingïoh bynta lang baroh.
6. Ki jingdainkuna: Kane ka draft Bill ka wanrah ïa ka jingdainkuma kum ka advisory, jing mana, censure, lane ka jingdainkuna da ka pisa ïa ki nongpyntreikam ne ki broadcaster. Ki dang don ki kyndon na ka bynta ka jingset patok na ki jingdainkunahynrei kine ki dei tang na ka bynta ki jingbakla kiba heh.
7. Ki jingdainkuna kiba ryntih: Ïa ki jingdainkuna la pynïasoh bad ka jinglah siew jong ka kynhun da kaba peit ïa ka jingbei tyngka jong ki bad ka jingïohnong khnang ban pynthikna ïa ka jingryntih.
8. Ka jingïasam ïa ki jingdon jingem, ki jingai jingshakri ki rynsan bad ka hok: Kane ka bill ka wanrah ruh ïa ki kyndon na ka bynta ka jingïasam lang ïa ki jingdon jingem hapdeng ki nongpynïaid rynsan broadcasting. Ka pynbeit ruh ïa ka bynta jong ki hok ban pynbeit ïa ki jingïathut ha ka rukom kaba kham ryntih.
Ka tnat Information and Broadcasting ka ieng skhem ban wanrah ïa ka juk kaba thymmai kaba shai, kaba don ka jingbud ïa ki ain bad kaba la pynkhreh ïa ka lawei ha ki kam broadcasting ha ka ri lyngba ka Draft Broadcasting Services (Regulation) Bill, 2023.
Ka Tnat ka khot ïa ki jingai jingmut halor kane ka Bill na kito kiba ïadon bynta ha kine ki kam kum ki riewshemphang, kito kiba trei ha ki kam broadcasting bad ki briew shimet. Ïa ki jingmut jingpyrkhat lah ban phah da ka email sha ka jsb-moib[at]gov[dot]in hapoh 30 sngi ba la pynmih ïa kane ka kyrwoh.
Ïa ka bill lah ban ïoh na kane ka link harum – https://mib.gov.in/sites/default/files/Public%20Notice_0.pdf