Nongstoiñ, Naiwieng 11: Ka long ka sien kaba nyngkong eh ïa ka Ri Muliang baroh kawei, ba ki paid nongshong shnong jong katei ka thaiñ kin ïoh ïa la ka jong ka kali kit nongpang, ha kaba u R.G Momin MLA ka Rambrai Jyrngam konstitwensi ha ka sngi thohdieng u la ïoh ban pyllait paidbah ha Langpih ha ka jingsakhi jong kiba bun balang.
La ong ba ïa katei ka kali kit Nongpang la ai da u myntri rangbah ka jylla Meghalaya u Conrad K.Sangma lyngba ka Chief Minister’s Special Development Fund C.M.S.D.F jong u snem 2023-2024.
Hynrei, namar ka jingud jingnam palat ki paidbah jong ka thaiñ, ka la pynlong ïa u R.G Momin MLA ba un leit kyrpad ïa u myntri rangbah ban pan Ambulance, ha kaba tang hadien shi taïew u Conrad K.Sangma u la ai syndon haduh ar tylli ki kali kit nongpang kawei na ka bynta ka Ri Muliang bad kawei pat na ka bynta ka Rambrai.
Ïa katei ka jingïalang ba lyngkot la pynlong ha phyllaw ka Raidmynsaw Upper Primary School Langpih, ha kaba la ïadonlang ruh u bah Pynshlur Nonglyngkien president ka seng Independent, bah Lurshai Kharbani secretary ka Youth Wing, bah Hendro Samakha bad kiwei kiwei ki riew rangbah jong ka thaiñ Ri Muliang.
Haba ai jingkren u kongsan u la ong ba ha ka por elekshon don beit ka jingïakynthoh, hynrei mynta kam dei shuh kumta hap ban ïa klet noh. U la ong ruh ba ka ambulance kam dei jong kano kano ka party, hynrei ka dei jong baroh lang kiba ha ka konstitwensi.
