Ka Dorbar Shnong ka dei ka tynrai jong ka synshar ka khadar ha ka imlang sahlang jong ka jaidbynriew. Ha ki por ba kham mynshuwa ka Dorbar shnong ka dei tang kata ka jaka treikam ne iakynduh lang jong ki riew khmat kiba la ai bor bad pynkhamti da ki paidbah ban peit ai ka bha ka miat jong ka shnong ka thaw bad ka imlang sahlang. Hynrei ha kine ki sngi kiba mynta ka Dorbar shnong ka la kylla long kawei na ki bynta ba kongsan jong ka imlang sahlang. Ha ki shnong kiba ka Dorbar Shnong ka khlain bha ka jingtrei kam, ki paidbah ki lah ban ioh shibun ki jingmyntoi ym eh tang na kaba ap ia ki skim sorkar. Khamtam lei ha ba peit sha ki jingeh jong kine ki sngi ba mynta ka long kaba donkam ban pynkhlain ia ka Dorbar Shnong khnang ba yn lah ban pynneh pynsah ia ka jinglong tynrai jong ka jaidbynriew bad iada na ka jingryngkyrthep ki briew kiba nabar.
Ym tang ha ki jaka sor hynrei wat ha ki jaka nongkyndong ruh ka long kaba donkam ban don ia ka Dorbar shnong kaba khlain bad kaba stad trei kam. Kam da dei eh ba tang kita kiba heh kyrdan ki lah ban peit ia ka bha ka miat jong ka shnong ka thaw ne shimti ia ki kam rangbah shnong, hynrei ka shnong ka donkam ia ki briew kiba trei bad kiba aiti na ka bynta ka miat jong u paidbah. Ka Synjuk ki Rangbah Shnong ka donkam ban don ia ka dorbar kaba kyrpang bad shimkhia ban pynioh ia ki jingai jinghikai halor ka kam synshar khadar sha ki rangbah shnong khnang ba kin long kiba kham tbit ban peit ia ka kam na ka bynta u paidbah.
Ka long ruh kaba donkam na ka liang jong ki nongmihkhmat kum ki MLA/MDC ban peit bad ia rap ia ka jingdonkam ban pynioh ia ka jaka trei kam kaba biang ia ki Rangbah Shnong. Ka jingdon jong ka jaka treikam ne ka Ophis kaba biang kan iarap ban kham kyntiew shuh shuh ia ki Dorbar Shnong bad ai mynsiem ia ki ban trei kham bha. Ka Politik kaba nyngkong eh ka sdang hi napoh ka shnong ka thaw ha kaba ki paidbah ki donkam ban jied ia ki Rangbah Shnong kiba tip bad kiba shemphang bad ruh kiba don ka mon ban shakri paidbah shisha. Namar ba u briew uba jaituh ne u bymdonsap wat la u lah ban long uba heh kyrdan hynrei un ym lah pat ban wanrah ia ka jingkylla hapoh ka shnong ka thaw namar ka jingkylla ka wan tang lyngba ki briew kiba trei.
Kumta ki paidbah kim dei ban sngewthuh bakla ne khein dew thala ban shu ieh kumta ia ka kam shnong kam thaw. Ka jingiashim bynta shitrhem jong ki paidbah ha ka kam shnong ka thaw bad ha ka iap ka im ka ai mynsiem shibun ia ki Rangbah Shnong bad kane kan iarap shibun ban pynkhlain ia ka jingtreikam jong ki. Ka jingkhlain jong ka shnong bad ka itiar synshar jong ka, ka long ka jingkyrmen ia ka lawei jong ka jaidbynriew. Ka jingiashimbynta shirthem jong ki samla ban kit ia ka kam shnong kam thaw kum ki sengsamla bad ki dkhot ka Dorbar Shnong ka buh ia ka shnong ha ka lawei kaba shngain namar ba dei ki samla ki ban sa long ki rishot ha ki sngi kiban dang wan.
Ha ki jaka sorkar bun ki Dorbar Shnong ki la long kiba biang namar ka jingioh ia ki nongkitkam shnong kiba lah. Ki thain nongkyngdong ruh ki dang don shibun ki lad ban kyntiew ia ka shnong ka thaw. Khamtam lei ha ki nongkyndong ki dang don shibun ki jaka kiba lait na ka bynta ban ioh ban tei ia ki iing shnong ne cummunity hall bad ruh ki ophis trei kam. Ki nongkitkam shnong kiba don ka jinglah, ki lah ban iakren bad ki nongmihkhmat jong ka thain na ka bynta ban pynioh ia ki skim sorkar kiba kham heh ban thaw ia ki iing shnong kiba biang bad ki jaka trei kam kiba paka khnang ba yn lah ban kyntiew ia ka rukom treikam kat kum ka jingdonkam jong kane ka juk mynta ryngkat bad ki computer bad ki jingthoh jingbuh jingkhein jingdiah kiba biang.
