Wanrah ka ECI da ka M3 EVM ban pynsuk thep vote ïa ki nongbylla shabar na jylla

0

Shillong, Nohprah, 29: Ka Election Commission of India (ECI) ka la pynkhreh ban wanrah da ka pilot project ban pynsuk ïa ki nongbylla nabar ka jylla ha kaba kim donkam shuh ban leit thep vote sha la ka jong ka jylla ynda la dei ka elekshon.
U Chief Election Commissioner u Rajiv Kumar bad ki Election Commissioner kiba kynthup ïa u Anup Chandra Pandey bad u Arun Goel ki la pyrshang ban wanrah da ka M3 EVM khnang ban pynsuk ïa ki nongthep vote nongbylla ha kaba ki lah bah ban thep ïa ka vote ha ki Polling Stations kiba don shabar na la ka jong ka jylla. Ki nongbylla bar jylla kim donkam shuh ban leit phai sha la iing ban thep ïa ka jong ka vote ha ka por elekshon.
Ka ECI ka la sam sha ki seng saiñpyrthei ïa ka jingthoh kaba kdew ïa ki jingeh kiba ïadei bad ki nongbylla, ka jingpyntreikam ïa ka Model Code of Conduct, ka jingpynthikna ban buhrieh ïa ka vote ba la thep ba kam dei ban paw shabar, ka jingpynbiang ïa ki Polling Agent na ka bynta ka jingithuh ïa ki nongthep vote, ka rukom pyntreikam ïa ka jingthep vote ha ki jaka nongkyndong bad ka jingñiew ïa ki vote bad kiwei kiwei de ki mat.
Ka Commission da ka jingïatreilang bad ki Public Sector Undertaking ba pawkhmat ka la pynkhreh ïa ka Multi Constituency Remote Electronic Voting Machine (RVM) khnang ban pynsuk ïa ki nongbylla shabar ka jylla ba kin ïoh thep ïa la ka jong ka vote haba ki leit bylla sha jngai la iing.
Ïa ki EVM ba la shna pynwandur thymmai yn sa pyntreikam ha ki 72 tylli ki Cnstituencies na kawei ka Polling Booth kaba don sha nongkyndong. Kane ka jingsdang, lada pyntreikam, kan wanrah ïa ka jingtreikam ba thymmai na ka bynta ki nongbylla ha kaba bunsien ka jingleit bylla jong ki sha jngai na la iing ka pynlong ïa ki ban kynriah ïa ki jaka sah na kawei ka jaka sha kawei pat, khamtam ha ki jaka ba ki long nongwei ha ki jaka bylla, ka jingkyntait ban pyndam noh ïa ka kyrteng na ka Electoral Roll na ki Constituency namarba ki don ïa ka jaka sah bad ka nongkynti ha la ka jong ka shnong.
Ka Commission ka la pynkhreh ban pyntreikam ïa ka Multi-Constituency Prototype Remote EVM ha ka 16 tarik, Kyllalyngkot, 2023 lyngba ki 8 tylli ki National Party bad ki 57 tylli ki seng saiñpyrthei ba la ïoh jingithuh ha ki jylla lyngba ki dkhot jong ka Technical Expert Committee.
Ka Commission ka la bthah ïa ki seng saiñpyrthei ba kin phah ïa ki jingpynsngew lyngba ki jingthoh ha lane shwa ka 31 tarik, Kyllalyngkot, 2023 halor kane ka mat bad kiwei kiwei de ki mat.

Leave A Reply

Your email address will not be published.