Lada phim sngew lah ban jop na ka Congress ne TMC pan tiket na ka BJP: Bah Sanbor

Sahngeh mardor ban pharia da ka jingsngew niam hynrei kren ïa ka roi ka kiew

By Mawphor News Desk On Dec 30, 2022

Shillong, Nohprah 29: U Nongïalam ka BJP bad u Myntri ka sorkar jylla u Bah Sanbor Shullai ha ka sngi Palei u la kyntu ïa ki nongïalam ka All India Trinamool Congress (AITC) bad ka Congress ba kin pan tiket noh na ka BJP lada ki la sngewthuh shai ba party kaba ki don mynta kan ym lah ban pynjop elekshon ïa ki.
U la ong ruh ba ka jingleh jong ki nongïalam jong kine ki ar tylli ki party ka pyni shai ba ki la sngewthuh ba ka seng jong ki kan shah kyntait ha u paidbah, namarkata ki pyrshang ban leh katlah katïai ban khroh ïa ka vote ki Khristan da kaba wanrah ïa ki mat ba ïadei bad ka niam.
“Baroh ar kine ki party kim don ishu ban kren sha u paidbah lait tang ban wanrah ïa ka jingsngew ïapher niam kaba ki pyrshang ban bsut ha ka jabieng ki poaidbah ka jylla na bynta ka jingmyntoi saiñ pyrthei jong ki,” u la ong.
U la ong ruh ba ha ka jylla ym don uwei ruh u riewngeit Khristan uban sngew syier ne rit mynsiem na ka daw ka BJP ne na ki nongïalam bad nongtrei jong ka.
“80% na ki nongïalam jong ka BJP ha ka jylla ki dei ki Khristan bad lada phi peit ha Nagaland ha kaba 98% ki nongthep vote ki dei ki Khristan bad ki jied kumba 12 ngut ki MLA na ka BJP. Ha Manipur ki paidbah ki jied 7 ki MLA kiba dei ki Khristan na ka BJP bad lada phi peit wat ha South Goa kaba ki nongthep vote kiba bun ki dei ki Khristan ka BJP ka jop haduh 9 ngut ki MLA bad kumjuh ha jylla Mizoram kaba bun hi ki nongshong shnong ki dei ki Khristan hynrei u CEM ka Mara Autonomous District Council ha South Mizoram jong ka Siaha District u M. Laikaw u dei na ka BJP. Nga kwah ruh ban ïathuh ba ka BJP ka la pynïakhun da u kyrtong Khristan ha Gujarat u Mohan Konkani na Vyara constituency bad u lah ban pynliem ïa u kyrtong na ka Congress uba la jop ruh haduh 4 sien kum u MLA,” u la ong.
Shuh shuh u la kyntu ïa ka Congress bad TMC ba kin da leh ïa ki homework ba lada ki sngewthuh shai ba kim lah ban pynurlong ïa kaei kaba ki kular bad ban jop elekshon na ki mat jong ki ba horkit hordang kim dei pat ban wanrah da ka jingïasngewpher niam ban jop elekshon hynrei ba kin kren halor ka roi ka kiew ka jylla.
“Wan sha ka BJP ka party jong baroh ki jingngeit niam kaba khlem pynïapher ruh phi dei ka niam aiu ne ka balang aiu hynrei kaei kaba ngi kren ka dei beit thik ïa ka roi ka kiew jong baroh lang,” u la ong.