Shillong, Nohprah 29 : U MLA jongka Mawlai Constituency u bah Process T Sawkmie u pynpaw ka jingsngew khia jur halor ka jingthmu ka sorkar Assam ban lum jingkheiñ ïa ki Khristan kiba don hapoh katei ka jylla.
Haba ïakren bad u nongthoh khubor u la ong “ Kane ka jingleh jongka sorkar Assam ba la ïalam da ka BJP ka thew sha jngai bah bad ka long thik kum ka jingthmu ban thom bor bad ïuh roit ïa ki paid Khristan kumba la ju jia ha kiwei ki jylla ba synshar da ka BJP. Dang ha kine ki khyndiat sngi la jia ruh ka jingshah thombor ki Khristan ha Mysore ha kaba ki riew shitniam ki la leit ban pynjulor ïa ka iing mane bad pynpra ïa ka dur u Trai Jisu ruh”.
“ Kane ka jingleh jongka BJP ka thmu ban wanrah ka jingsngew ïapher niam bad pynthut ïa ka shongsuk shongsaiñ ha kane ka thaiñ bad khanglad ruh ïaki Khristan ba kin ïoh ban mane laitluid. Ka jingthmu ban lum jigkheiñ ïa ki Iing Mane, ka jingpynkylla niam ha kine ki san hynriew snem bad kiei kiba ïadonkti ka long kaei kaei kaba ym lah satia ban pdiang” ong u bah Sawkmie.
Kumta u bah Sawkmie u khot u wer ïa ki paid nongshong shnong ka jylla bad kane ka thaiñ hi baroh kawei ba dei ban ïeng tylli pyrshah ïa kane ka jingthmu ka sorkar Assam bad u kyntu bad kyrpad ba u Myntri Rangbah duh ka ri U Narendra Modi ruh u dei ban shim khia halor kane ka kam khnang ban ym don jingeh hadien habud.
