Thoh u Gokhale sha ka Vatican ba phah sorjamin ka Sorkar Assam ïa ki Iingmane Khristan

By Mawphor News Desk On Dec 30, 2022

Shillong, Nohprah, 29: U National Spokeperson jong ka All India Trinamool Congress (AITC) ha ka sngi Palei u la phah da ka jingthoh sha ka Embassy jong ka Vatican halor ka jingkynnoh ba ka Sorkar BJP ha Assam ka la pynmih da ka notis ba la bthah ïa ka tnat Pulit ban phah sorjamin ïa ka jingdon jong ki iingmane Khristan ha ka jylla Assam bad kyntu ba ka Vatican ka dei ban ïakren ïa kane bad ka Sorkar Pdeng.
Ha ka shithi ba la phah sha u Apostolic Nuncio ka Vatican sha India u Most Rev. Leopoldo Girelli, u Gokhale u la thoh, “lyngba kane ka jingthoh, ngi kwah ban pynsngew ha phi ïa kane ka kam kaba ktah bha ha ka jylla Assam bad da ka jingkyrpad ban pyntip sha u Pope Francis bad sha ka Vatican ha kaba ïadei bad ka jingiuhroit ba la aibor da ka Sorkar pyrshah ïa ki Khristan bad ban rah ïa kane ka mat sha ka Sorkar India.”
Une u Nongaitktien jong ka Trinamool Congress u la kdew ïa ka jingpynmih hukum jong ka tnat Pulit Assam ban lum jingkheiñ halor ka jingdon jong ki Iingmane ha ka jylla Assam ryngkat bad ïa ka jingtip ba bniah ïa ki briew kiba donkti ban pynkylla niam jubor.
Halor kane, bun ngut ki nongïalam jong ka Trinamool Congress ba kynthup ïa u Vice President ka Meghalaya TMC u Bah George Lyngdoh ki la takraiñ tyngeh ïa ka Sorkar Assam halor ka jingpynmih hukum jong ka tnat Pulit ka jylla Assam.
Ha ka shithi, u Gokhale u la ong ba ka Sorkar Assam ka la pyndonkam da ka tnat Pulit bad ka tnat syntiat, “ban kthong ym tang ïa ki nongïalam Niam Khristan ha ka jylla hynrei wat ïa ki nongshong shnong kiba la jied ban pdiang ïa ki jinghikai jong u Trai Jisu Khrist bad kiba la kylla sha ka Niam Khristan.”
“Ka hok ban phla, ban pynphriang bad ban im katkum ka jingngeit ka dei ka hok ba la ai hapoh ka Article 25 jong ka Riti Synshar ka Ri India. Nalorkata, ki aiñ ka pyrthei (international law), kumjuh ruh ka Geneva Convention ka ithuh ïa ka hok ban mane laitluid bad ban im katkum ka jingngeit ka dei ka hok longbriew,” ong u Gokhale.
“Da katei ka hukum ba la kdew hangne, ka Sorkar BJP ha Assam mynta la seng nongrim ïa ka jingpynshitom bad ka jingpynlong sohpdung ïa ki Khristan bad ïa ki Iingmane ha ka jylla bad da kaba pyndonkam da ka tnat Pulit bad ka tnat syntiat ban pynduh ïa ka hok jong ki Khristan ban mane laitluid bad ban pynlong sohpdung ruh wat ïa kito kiba pdiang ïa ka Niam Khristan,” u la bynrap.